Ilaasa silaannakkuinnaq angallassilertoqarsinnaasorinngilaat
Angallassineq timmisartuinnarmik ingerlanneqalissappat, timmisartuussinerlu arlaatigut unittooriataassagaluarpat, assersuutigalugu innermik anitsisup arsakui peqqutigalugit, Isumalioqatigiissitap siulittaasuata, Christen Sørensenip taamaattoqartillugu sinersortaatip iluaqutigineqarsinnaanera ilimaginngilaa:
- Innermik anitsisumit silaannaq arsakoqalissagaluarpat, umiarsuaq ilaasorpassuaqarnissaminut inissaqartitsinngilaq. Taamaammat qanoq pigaluaraanniluunniit periarfissat killeqassallutik. Immakkut angallatigisinnaasat naammannissaat neriuutigiinnarneqarsinnaavoq, apuuffissamut apuuttoqarsinnaaniassammat. Soorunalimi sinersortaateqartillugu periarfissat amerlanerulaassapput, taamaatulli periarfissaqarusukkaanni akeqarpoq. Angalasinnaanerit qulakkeerniarlugu qanoq akileerusussavit? Tamanna aningaasarsiornermik ilisimasallip naliliivigisinnaanngilaa.
Arctic Umiaq Line, aningaasanik amigartooruteqarluni ingerlasoq, pisortanit ukiumoortumik amigartooruteqannginnissamut qularnaveequsiivigineqartarnertik iluaqutigalugu ingerlapput.
Kingullermillu aggustip tungaanut 12 millionit koruuninik qularnaveequsiivigineqarpput, taamaammallu sinersortaat qanoq siunissaqassanersoq, piffissami qaninnermi aalajaviigineqartariaqassaaq.
Inatsisartuni tamanna pillugu isummat assigiinngiiaarput.
Attaveqarnermut ataatsimiititaliap siulittaasuata, Demokraatineersup Justus Hansenip sinersortaateqarunnaarnissamik siunnersuut akueraa:
-Matuniarneqarmat paasisinnaavara, uangalu tamanna nammineq isumagaara. Taanna aningaasartuutini annertuutut inissisimavoq.
Timmisartornermi akigitinneqartut assigivaat, aallaalluunniimi umiarsuarnut ilaalluni akigitinneqartunit akikinnerullutik, taamaattumik ajornartorsiut sumiinermersoq takusinnaanngilara.
Timmisartuussinerlu unittoortilugu angallannermi ajornartorsiulernissaq annilaanngatiginngilaa.
Siumut siulittaasuata, Aleqa Hammondip sinersortaatip ingerlaannarnissaa pingaaruteqartippaa. Angalaniat qinigassaqartinneqartariaqarnissaat, inuiaqatigiit ajutoornermut sillimaniarsinnaaniassammata minnerunngitsumillu immakkut angalanerup inuttut pissarsiaqarnarnera peqqutigalugit.
Aleqa Hammondillu Arctic Umiaq Line akissaataajaannartut nalilerneqarnera isumaqataaffiginngilaa:
- Assersuutiginiartarpagut nunani assigiinngitsuni aamma Danmarkimi atukkat. Danmarkimi naalagaaffiup aningaasatigut tapiissutigisarpaat DSB-mut, tassalu qimutsuitsut imminnut ataqatigiillutik ingerlasinnaaniassammata, ukiumut 4,2 milliardit koruuninik. Inoqqortussutsimut taavalu isorartussutsimut nunatsinnut sanilliutissagutsigu, Arctic Umiaq Line kisimik 42 millionit koruuninik nalilimmik tapiiffigineqartartussaagaluarpoq, ingerlatsineq ataqatigiissoq pilersinniarlugu, Aleqa Hammond oqarpoq sipaarniarnermilu pingaarnersiuineq apeqqusernartoqartippaa:
- Landskarsip sipaaruteqarnissaannaa siunertaralugu isummersuutit aalaaveqassappata, inuiaqatigiit nikissinnaaneranut periarfissat ajorseriaateqarlutillu toqqagassaarunnissaat isumaqarpunga pingaarnersiunineq apeqquserneqartariaqartoq, Siumumi siulittaasoq Aleqa Hammond oqarpoq.
Attaveqarnermut angallannermut ineqarnermullu Naalakkersuisoq, Jens B. Frederiksenip, sinersortaatip siunissaa pillugu suliaqartoqarsimasoq nalunaarutigaa, tassanilu aalajangiutissatut periarfissat arlaqartut Naalakkersuisunit sapaatit akunneri marluk qaangiutsinnagit isummerfigineqassasut oqaatigaa.
