Ikummatissat ullumimiit akikillipput

Solaarip, petroleup benziinallu akii 21 oorimik ullumimiit atuutilersumik akikillineqassasut KNI-p pigisaata PolarOilip tusagassiuutinut nalunaarummini ippassaq ualilluarnerani nalunaarutigaa.
Allattoq Hagen Højer Christensen, Mads Lynge
apriilip 30-at 2015 07:34

Ikummatissat 21 oorimik akikillineqarnerat ikummatissanut nalinginnaasunut tamanut atuuppoq.

Solaarip akia 6 koruuni 40 øremit 6 koruuni 20 øremut akikillissaaq.

Petruuliup akia liiterimut 6 koruuni 52 øreugaluartoq 6 koruuni 31 øremut akikillineqassaaq.

Kiisalu benziina aamma akikillineqarpoq, tassa liiterimut 6 koruuni 26 øreqariarluni 6 koruuni 5 øreqalissagami.

Ukiut siuliini periaaseq naapertorlugu Polaroilip ikummatissap 2015-imi pisiassami akii aalajangersimasumik isumaqatigiissuteqarnikkut qulakkeerneqarsimanerat pissutigalugu, ikummatissat akii ilaatigut akikillineqarsinnaasut Polaroilip nalunaarutigaa.

- Tamannalu aningaaserivissuit arlariiaat suleqatiginerisigut pisarpoq. Akitigut isumaqatigiissutit 2015-imi ukiup siulianut sanilliullugit appasinnerummata, Polaroilip ikummatissanut akigititai appartinneqarsinnaalerput, Polaroil tusagassiuutinut ilaatigut taama allaaserisaqarpoq.

Ikummatissat akii kingullermik siorna decembarip aallaqqaataani nalimmassarneqarput. Taamanikkut akit aamma appariangaatsiarput, tassami aggustip aallaqqaataata missaani ikummatissat akitsorneqaraluarmata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq