KNI: Ikummatissat nunatsinni akisunerulissanngikkallarput
Ikummatissat akii nunarsuami sumiiffinni arlalinni qaffapput. Tamanna Russit Ukrainemik saassussinerisa kinguneranik pivoq.
Solarimik, benzinamik gassimik ikummatissanillu allanik nunatsinni angerlarsimaffinni peqqumaasersupallannissaq pisariaqanngilaq.
AAMMA ATUARUK Múte Ruslandip saassussinera pillugu: Nunarput iliuuseqarnissamut piareersimavoq
Ikummatissammi qaammatini tullerni akitsussanngitsut, KNI-p pisortaanera oqarpoq.
- Pisisartut akiliutaannut maannakkorpiaq sunniuteqassanngilaq. Akimmi piffissami aalajangersimasumi qulakkeertarpagut, Jeppe Jensen KNR-imut oqarpoq.
Ukiussamut peqqumaasersoreertut
KNI Polaroililu ikummatissanik aasaanerani pisisarput. Taakkualu inoqarfinnut ukiumut peqqumaatitut assartorneqartarmata pisisartunut akit imaaliallaannaq allanngussanngillat.
Aasaru peqqumaatinik ukiussamut pisinissami, nunarsuarmi uuliap akii suli qaffasissappata, nunatsinni innuttaasut aamma akiliinerusalersinnaapput.
- Akit qaffasiinnassappata atuisut tamanna aamma piffisami qaquguugaluarnersoq malugisinnaassagaat qularnanngilaq. Kisianni maannamut nalunngisagut malillugit ajornartoorneq Kalaallit Nunaanni innuttaasunut sunniuteqassanngikkallarpoq.
Ruslandimit pisineq ajortut
Ikummatissat, soorlu uulia gassillu annertuut, Ruslandimit avammut tunineqartarput. Taakkuli nunatsinni najukkat kiassarnerannut, angallatit aquuteralaasa ingerlanerannut, biilinut allanillu uuliamik atuisunik atorneqarneq ajorput.
- Gassimik uuliamillu Ruslandimit eqqussuineq ajorpugut. Ikummatissat Sverigemi pisiniarfigisartakkatsinni pisiarisarpagut, taakkualu uuliaataat Nordsøminngaanneerlutillu Afrikap kitaaneersuupput.
Uuliali kisimiinngilaq. Nioqqutissammi aallat KNI-p ukiussamut peqqumaatitut inoqarfinnut assartoriigai akitsussanngitsut, pisortaq oqarpoq.
AAMMA ATUARUK Politikerit Ukrainimut saassussineq pillugu: Sorsunnermiit ungasissorujussuarmiittutut eqqarsassanngilagut
Nioqqutissiat Ruslandimeersut Ukrainemeersulluunniit ataasiakkaat nunarsuarmi niuerfinni akitsussappata, nunatsinnut siunissami aamma kingunerlussinnaavoq.
- Nerisassat assigiinngitsuusinnaapput. Assersuutigalugu qajuusat akii sunnerneqarsinnaapput, taakkumi amerlasuut Ukrainemeersuullutillu Ruslandimeersuusarput.