Ikummatissat imerpalasut akiinik appaaneq Naalakkersuisut tusaatissatut tigugaat

Inuussutissarsiornermut, Suliffeqarnermut Niuernermullu Naalakkersuisoqarfiup tusagassiorfinnut ippassaq nalunaarutaa naapertorlugu, ikummatissat imerpalasut januaarip ulluisa tallimaat aallarnerfigalugu literimut 27 ørenik akikillineqarnissaat pillugu Naalakkersuisut KNI-imit maanna ilisimatinneqarput.

Ilisimatitsinerullu kingorna Polar Oilip akinik appaanermik marlunngormat nalunaaruteqarnera tusaatissatut tiguneqartoq oqaatigineqarpoq.

Aningaasaqarnermut naalakkersuisup Vittus Qujaukitsup akinik appaaneq annikigalugu appaaqqittoqarnissaanik piumasaqarluni marlunngormat isornartorsiuigaluarpoq.

AAMMA ATUARUK Vittus Qujaukitsoq: Isumaga allanngunngilaq

Naalakkersuisulli akinik appaanermut tunuliaqutaasut pillugit ilisimatinneqarnerisa kingorna aki siunnersuutigineqartoq naammagisimaarlugu maanna oqaatigaat.
 
Piffissami 2012-imit 2016 ilanngullugu ikummatissat imerpalasut pilersuutigineri pillugit Namminersorlutik Oqartussat aamma KNI-p akornanni kiffartuussinissamik isumaqatigiissut atuuttoq malillugu akinik appartitsisoqartoq aamma nassuerutigineqarpoq, Randi Vestergaard Evaldsenip naalakkersuisoqarfia taama ilisimatitsivoq.

AAMMA ATUARUK Polar Oilip akinik nalimmassaaniarnera akuerineqarnikuunngilaq

Kiffartuussinissamik isumaqatigiissut Polar Oilip piffissami 2012-imit 2016-imut sinneqartooruteqarluni ingerlanissaanik piumasaqaammik imaqarnera naalakkersuisoqarfiup ilanngullugu nassuerutigaa, piffissami kiffartuussinissamik isumaqatigiissuteqarfiusumi tankeqarfinni aserfallatsaaliuinissamik suliarisassanut amigaataasunut naleqqiullugu kivitsisoqarnissaa matumani pineqarluni.

Naalakkersuisut nalunaarutertik naggaserlugu allapput siunissami KNI-mut/Polar Olilimut kiffartuussinissamik isumaqatigiissuteqarnerni nunarsuarmi akit appariartornerat isiginiarneqarnerunissaat neriuutigalugu, taamaaliornikkut innuttaasunut iluaqutaaneruniassammat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat