Ikummatissat akitsorput
Polaroilip ikummatissanik akitsuinera ullumikkumiit atuutilerpoq. Solaari liiterimut 54 ørenik akitsorpoq, petruuliu liiterimut 55 ørenik akitsorluni Benziinalu liiteriimut 39 ørenik akitsorluni.
Polaroilip taama qaffaanerminut nassuiaatigaa, uuliap akuiarneqanngitsup akuiarneqarneranullu assigiinngissutinut isumaqatigiissutit nappartamut akiat 2013-imut naleqqiullugit 2014-imi Amerikamiut aningaasaannik 10 dollarsinik akisunerusoq, nunarsuarmili akigitinneqartunit suli appasinnerulluni.
Polaroil KNI-p aningaasanik isaatitsissutigaa, ilaatigullu Pilersuisup nunaqarfinni pisiniarfinnik ingerlatsineranut qulakkeerinnittuulluni.
Polaroil 73 millionit koruuninik siorna sinneqartoorpoq ukiullu siuliani 80 millionit koruuninik sinneqartoorluni. Aningaasat taakku KNI-p tamakkiisumik naatsorsuutaanut ilanngunneqartarput, suliffeqarfillu taanna Namminersorlutik Oqartussanit pigineqartoq taamaalilluni sinneqartoorluni.
AAMMA ATUARUK Aningaasanik isaatitsivik Vittusip aqukkusuppaa
Aningaasaqarnermut nunamilu namminermi naalakkersuisup Vittus Qujaukitsup Polaroilip akigititai februaarimi isornartorsiorpai. Tassa taamani isumaqarami Polaroil aningaasanik KNI-mut nuussisinnaaniassagami akisutitsisoq.
Royal Arctic Line assartuinermi akinik qaffaareersorlu Vittus Qujaukitsup ikummatissat akikinnerulernissaat kissaatigalugu taamani oqaatigaa, tamatumali akerlerluinnaanik maanna pisoqarluni.
Solaarip benziinallu akiisa assigiinngissutaannut nassuiaatigineqartoq tassaavoq, ikummatissat Europami piumaneqarnerisa allanngoriartornerisa kingunerinik solaarip akia benziinap akianit qaffariartornerusimasoq.
Ikummatissat akii siorna juunip arfineq aappaanni qaffanneqarput, taamanikkut qaffaaneq 26 øre-ulluni.
Taamaattorli naak akit qaffariaateqaraluartut Nunatsinni ikummatissat akii Danmarkimi akigitinneqartut affaasa missaannik akeqartut oqaatigineqarpoq.
Ikummatissat liiterimut akii ullumikkumiit imaalerput:
Solaari 6 koruuni 11 øremit 6 koruuni 65 øremut akitsorpoq. Petruuliu 6 koruuni 21 øremit 6 koruuni 76 øremut akitsorpoq benziinalu 6 koruuni 11 øremit 6 koruuni 50 øremut akitsorluni.
