Ikummatissat 25 ørimik akitsorput

Nunarsuarmi uuliamik nioqquteqarnermi uuliap akiata qaffaraluttuinnarnera tunuliaqutaralugu KNI-p nunatsinni ikummatissanut imerpalasunut liiterimut akigititani ullumi atuutilersumik 25 øremik akitsorpaa.

Tassa orsussaq benzina liiterimut 2 koruuni 87 øreqartoq ullumimiit, 3 koruuni 12 øreqalerpoq. Gasuulia liiterimut 2 koruuni 43 øremiit 2 koruuni 68 øreqalerluni, petroliululu liiterimut 2 koruuni 62 øremiit 2 krone 87 øremut akitsorpoq.

Ikummatissat imerpalasut akitsornerat innaallaagissap, erngup kiassarnerullu akiinut nutaanut sunniuteqassanngitsoq, Margrethe Sørensen, Namminersornerullutik Oqartussani nukissiuutinut imermillu pilersuinermi immikkoortortap pisortaa oqarpoq.

- Ikummatissat akitsornissaat qaffannissaat qaammatip ataatsip missaani nalunngereeratsigit, 2005-imi aningaasanut missingersuusiornitsinni akitsuinissaq eqqarsaatigereersimavarput, Margrethe Sørensen nassuiaavoq.

2005-imi uuliap akisunerulernissaa Nukissiorfiit aamma piareersimaffigereersimagaat, Nukissiorfinni pisortaq Svend Ove Nielsen oqarpoq.

Ikummatissat imerpalasut siorna juunimi kingullermik akitsormata, akitsuut 12 øreuvoq.