Ikummatissap akia aqagu arfininngornermi appartinneqassaaq
Ikummatissap akia apriilip aallaqqaataani appartinneqassapput. Polaroil tusagassuutinut nalunaarummi taama allaaserisaqarpoq.
Allattoq Kenneth Elkjær
marsip 31-at 2017 16:52
Gasoliep, petroliup benziinallu liiterimut 20 øremik aqagu arfininngornermi atuutilersussamik akikillissasut Polaroilip nalunaarutigaa.
Benziina taaamaasilluni liiterimut 5,60 koruuninit 5,40-nut akikillissaaq. Dieselip liiterimut akia 5,75 koruuninit 5,55-inut appartinneqassaaq, petroliulu liiterimut 5,86 koruuninit 5,66 koruuninut akikillissalluni.
Ikummatissat akii 2014-ip kingorna tallimassaa appartinneqarput. Ikummatissap akia 2014-imi aasaaneranit liiterimut 1,1 koruuninik taamaasilluni appartinneqarpoq.
2017-imi ikummatissarsiniarnissami akit qulakkeerneqarsimasut appasinnerunerat amerikamiullu aningaasaata nalinganik qulakkeerinnissutit akikinnerunerat akit appartinneqarnerannut pissutaanerpaasut, Polaroilip nalunaarutigaa.
