Ikummatissanik atuinerput annertusiartuinnarpoq
Oliamik benzinamillu atuinerput annertusiartuinnarpoq, tamannalu silaannarmut kuldioxid-imik aniatitsinitta annertusiartorneranik kinguneqarpoq, naatsorsueqqissaartarfik taama nalunaarpoq.
Silaannaq ipinartortalik, Kuldioxid nunarsuatta kiatsikkiartorneranut pissutaasutut pasineqartartoq, nunat issittumiittut silaannaanut sunniuteqapiluttoq oqaatigineqarpoq.
Kisitsisit nutaat takutippaat 2003-mut sanilliullugu siorna 13 procentimik nukissiuteqarnermik atuinerusimasugut. Taamaalilluta kuldioxid-imik aniatitsinerput qaffassimavoq, ukiut tallimat matuma siorna kuldioxid-imik aniatitsisimanitsinnut assersuunneqarsinnaalluni. 2001-mi 2002-milu nukissiutinik atuinerput apparsimagaluarpoq.
Taamaalilluta Kyoto-mi isumaqatigiissutip nunatta atsioqatigiiffigisaa eqqarsaatigalugu killormut ingerlalerpugut.
Isumaqatigiissut piumasaqarpoq gassimik toqunartulimmik aniatitsinerput 1990-mut sanilliullugu 8 procentimik annikillisittariaqaripput. 2003-mi kuldioxid-imik aniatitsinerput 1990-mut sanilliulluni 5 procentimik annertunerusimavoq.
