Ikumatitamik akerliusut Kinap assuarai
Ulluni kingullerni Olympiade-mut ikumatitap Londonimi Parisimilu angallanneqarnerani ajoquserniarneqarnera Kina-p sakkortuunik oqaaseqarfigalugu assuaraa.
Allattoq Louise M. Kleemann
apriilip 08-at 2008 08:39
”Tibetimiut avissaarniat” ikumatitamik ingerlaartitamik ajoqusiiniartuunerarlugit Kinamiunit pisuutinneqarput.
Kinamiut nunanut allanut ministeeriaqarfiannit pisoq Olympiadep anersaavanut mingutserisutut oqaatigineqarpoq.
Ikumatitap Parisimi ippassaq ingerlaartinneqarnissaanut politiit 3000-it nakkutilliitinneqarput. Taamaakkaluartoq ikumatitap ingerlaartinneqarnera taamaatiinnarneqarpoq.
Ikumatitaq ullumikkut qasuersaartinneqarpoq, aqaguli Amerikami illoqarfimmi San Franciscomi ingerlaartinneqassalluni. Ippassaq ikaartarfimmi Golden Gate Bridge-mi wirersuarnut 45 meterinik portussusilinniittunut Tibetimiut erfalasuat amuneqarpoq allagartarsuarlu ikaartarfiup qulaanut ima allassimasoq nivinngarneqarpoq: ”Tibet naqisimaneqanngitsoq.”
