Ikumalaartitsineq maangaannarlu eqqaaneq Ilulissani inerteqqutigaat

Pinngortitamik nakkutilliisoq Aron E. Petersen inerteqquteqalerneq pillugu ima oqarpoq.

- Qaqiffiup eqqaani Sermermiut tungaanut ikaartarfiliap eqqaani nuna arfininngormat ikuallaleraluarpoq. Qujanartumik takujaarneqarallartilluni qatserisartunit qaminneqarsimavoq, oqarpoq.

Ilimagineqarpoq cigaretsikumit ikuallanneq aallartissimassasoq.

Ilulissat Kangiani nuna assut panernerarpaa, taseqarfiit eqqaanni nuna masakkaluarluni, kisianni isugutammit inornartoq panertorujussuulluni.

Aamma pinngortitamik paarsinerunissaq inassutigineqarpoq, maangaannaq eqqaanaveersaarnissaq oqaatigineqarluni.

- Puiaasaarakorsuit avaanngunaqaat nunamullu eqqartariaqarnatik. Igitassanik nassataqaraanni eqqaavimmut iginnissaat isumagisariaqarpoq. Takussunaqimmata ajunnginnerussagaluarpoq maangaannaq eqqanngikkaluarutsigit, Aron E. Petersen oqarpoq.

Aron E. Petersen Naalagaaffiit peqatigiit ilinniartitaanermut, ilisimatusarnermut kulturimullu Suleqatigiiffiata UNESCO-p Iluloissani kangia pillugu allaffiani Park Rangeritut - nunamik eqqissisimatitamik nakkutilliisutut atorneqarpoq.

Ikuallassimasoq alakkarlugu assilisaqattaarlugulu nalunaarusiarissallugu alakkarpaa.

Innuttaasut pinngortitami angalaarniartut ikumalaartitsinissaat inerteqqutigineqarpoq aammalu cigaretikunik igalaaminernillu, soorlu imigassat puukuinik eqqaanngilluinnarnissaat qatserisartunit inassutigineqarluni.