Ikuallattup pissutaanik misissuinermut ikiuiartortut Aasiannukartut
Toqusimasumik misissuisartoq, teknikerit marluk, ikuallattoqarsimatillugulu misissuisartoq Danmarkimit Aasiannut aqagu tikissapput.
Aasianni inissiat ilaanni sapaatip-akunnerata siuliani ikuallattoqarnerani toqungasumik nassaartoqarnera taakku misissussavaat.
AAMMA ATUARUK Aasianni arnaq ikuallattoqarnerani toqungasoq nassaarineqartoq
Politii pigaartuisa ilaat Aqqalu Petersen taama nassuiaavoq. Arnaq toqungasoq 60-it 70-illu akornanni ukioqartuusoq taassuma aamma oqaatigaa.
- Toqungasoq inissiami najugaqartuusoq ilimagaarput, toqusimasumilli misissuisartup tamanna misissoqqaassavaa, taana oqarpoq.
Inissiami pingasunngornerup sisamanngornerullu akornanni unnuakkut ikuallattoqarpoq.
Toqusimasumik misissuisartup teknikerillu misissuineranni inernerit sapaatip-akunnerata ingerlanerani saqqummiunneqarsinnaanissaat politiit pigaartuisa ilaata naatsorsuutigaa. Ikuallannermut toqusoqarsimaneranullu pissutaasut saqqummiunneqarsinnaassangasoralugit.