Ikuallattumi ajunaarfimmi najuuttoq: Misigisaq avaanngunaqaaq

Inissiaqarfiup Ilulissani ippassaq ikuallattup ilaani Hans Jørgensen najugaqarpoq. Misigisani sakkortooq oqaasertaleruminaatsippaa. Ukiut 41-t imaani inuussutissarsiorsimavoq nunami sulilernissami tungaanut. Ilaatigut politiit angallataanni inuttaasarsimavoq aamma imaannaanngitsunik naapitaqarfiusartumi.

- Kisianni nammineq angerlarsimaffigisami taamatut misigisaqarneq imaannaanngitsumik avaanngunarpoq, Hans Jørgensen KNR-imut oqarpoq.

Ippassaq unnukkut fjernsynertillugu politiit allallu annaassiniartartut qulliit ikittaartillugit nilliatitsillutillu takkupput.

- Ingerlaannaq eqqarsaatigivara suut naleqarnerussanerusut nassarsinnaanerlugit aniartorninnilu isaarissap eqqaanut ingiaqatigineqarpunga, Hans Jørgensen oqarpoq.

Politiit, qatserisartut portørillu sapinngisartik tamaat sulipput ikuallaffimmi pujuliortorujussuullunilu illorsuup ilua kissarujussuarmat.

- Inuit annaassiniarnermik suliallit assut nersorpakka. Pikkorilluinnarlutik suliartik ingerlappaat, Hans Jørgensen oqarpoq.

Taanna Hotel Hvide Falkimut inissikkallarneqarpoq ullumikkullu periarfissinneqarpoq najugaqartut allat peqatigalugit angerlarsimaffigisaminut takuniaanissaminut arlaannik annaassassaqarnersoq paasiniarlugu.

- Takusaq avaanngunaqaaq. Suna tamarmi paamik qernertuinnaavoq. Atisarpassuagut pigisavullu tipersuarmik sussaanngillat. Ineqartut ilaat takuara qullilisoq pisoq sakkortullunilu qanoq ilioriusissaaleqinaruttormat. Uanga aamma qamuuna assut aliasuppunga, Hans Jørgensen oqarpoq.

Taassuma qujamasuutigaa taama sakkortuumik misigisaqarnerminni inissiaateqarfik A/S Inimik ikiorneqarlutik akunnittarfimmut inissikkallarneqarnertik.

- Inissiaateqarfimmeersut aamma oqaloqatigigatsigit assut iluaallappoq, Hans Jørgensen oqarpoq.

Politiit qatserisartullu ikuallannermut pissutaasoq suli paasiniarpaat.

Inissiaqarfimmi ikuallattumi najugallit aqqarneq marluk akunnittarfimmut inissikkallarneqarput. Inigisaat sivisuumik najugarineqarsinnaanngikkallarput.