Ikuallattoqarnerani sulisoq akiliisitaasinnaavoq
Mianersuaatsumik ikuallajasunik atuineq sanaartornermi suliaqartumut akiliisitaanermik kinguneqarsinnaavoq. Innaallagissiorfitoqqap ikuallanneranut atatillugu inuk ataaseq politiit pasivaat. Qalissiap ussissarnerani qalissiaq ikuallalermat innaallagissiorfitoqaq atoqqikkallartussaajunnaarluni ikuallappoq.
- Ikuallanermut atatillugu angut ataaseq pasivarput. Suli isummerfiginngilarput suliffeqarfik aamma pasilliuteqarfigissanerlugu. Qatserisartut nalunaarusiaat utaqqimaarparput sullivinnullu nakkutilliisoqarfik aamma suliamut tunngatillugu tusarniarneqarluni, Qaasuitsumi politiit pisortaat Poul Petersen KNR-mut oqarpoq.
Innaallagissiorfitoqaq nungulluni ikuallassimasutut Nukissiorfinnit nalunaarutigineqarpoq. Erngup nukinganik Paakitsumi innaallaagissiorfissaq novemberimi atulissaaq innaallagissiorfillu angisooq illoqarfiup isuani Minnerup aqqutaaniilluni.
Nukissiorfinni suli isummerfigineqanngilaq innaallagissiorfitoqaq qanoq pineqassanersoq aammalu taarsiiffigitinissamik suliaqartoqassanersoq.
- Tamanna suli nalunarallarpoq. Teknikkikkut misissuinerit naammassinissaat utaqqimaararput tamatumalu kingorna sillimmasiisarfipput oqaloqatigeqqaartussaallugu. Tamanna pereerpat iliuusissamik pilersaarut saqqummiunneqarumaarpoq, Nukissiuuteqarnermut pisortaq Henrik Estrup KNR-mut oqarpoq.
Politiit nalunaarutigaat pasineqartoq pisuutinneqassaguni annerpaamik akiliisussanngortinneqarsinnaasoq.
