Ikuallattoqarnerani eqqugaasut tunissuteqarfigineqarluartut

Kalaallit Røde Korsiata Ilulissani atornikuerniarfia sisamanngornermi septemberip 20-ani Atersuarmi ikuallattoqarnerani atisaminnik pequttaminnillu annaasaqarsimasut ikiorniarlugit atisanik akeqanngitsumik tunissuteqarpoq. Tunissuteqarfigineqartut nammineerlutik atisat atorfissaqartitatik tigoorarpaat. 

- Eqqugaasut amerlanerit suna tamaat annaanikuuvaat, taamaattumik atorfissaqartitatik pisariaqartitatillu akeqanngitsumik pivaat, Kalaallit Røde Korsiata Ilulissani immikkoortortaqarfiani siulittaasoq Rachel Reimer Jensen taama oqarpoq.

Atersuarni ikuallanneq tallimanngorneq septemberip 14-iani pisoq angutip 46-nik ukiullip ajunaarneranik kinguneqarpoq. Inuit 12-ut Atersuarni najugaqarsimasut akunnittarfimmut inissinneqarput, kingusinnerusukkullu vandrehjemmimut nuutsinneqarlutik. Ilulissani Kalaallit Røde Korsiata immikkoortortaqarfiani siulittaasoq ikuallannerup kingorna angut napparsimavimmut unitsinneqarsimasoq sapaammi atisanik pajuppaa.

Sermermiuni katersuiniarneq
Ilulissani kulturip illorsuani Sermermiuni arfininngornermi septembarip 22-iani ikuallattoqarnerani eqqugaasut katersuiniunneqarput.

- Tunissutit amerlaqaat, allaat sofat, errorsiviit, fjernsynit, siniffiit, atisat, pequtit,  tunnissutigineqarput. Tunissuteqartut qujanaqaat, katersuiniarnermi aaqqissuusseqataasoq Helga Nielsen oqarpoq.

Ikuallattoqarnerani eqqugaasut ilaannai ikiuiniarlutik katersuiniarnermi tunnissutinik aallerput. Ikuallattoqarneranili eqqugaasut ikiorneqartut assut qujamasupput.

- Qujasorujuussuupput, Helga Nielsen oqarpoq.

Inunnit tunniunneqartut amerlangaarmata atisat pequttallu ilaannai ikuallattoqarnerani eqqugaasunit tiguneqarput. Atisat pequttallu ikuallattoqarnerani eqqugaasunit tiguneqanngitsut Kalaallit Røde Korsiata atornikuerniarfiani tuniniarneqaannarumaarput.  

Siniffiit amigaatigaat
Naak katersuiniarneq ajunngilluinnartumik ingerlasimagaluartoq suli ikuallattoqarnerani eqqugaasut ulluinnarni pisariaqartitamik ilaannik suli amigaateqarput.

- Soorlu ulluinnarni atortut, siniffiit, oqorutit, oqorutit qalii, kamiit, kavaajat oqortut. Allattorsinnarlugit pisariaqartitaat sinerissami immikkoortortaqarfitsinnut atornikuerniarfilinnut e-mailerutigivakka. Nuummi atornikuerniarfimmiit katersuillutik nassiussassanik maanga poortuutilereersimavaatigut, Rachel Reimer Jensen taama oqarpoq.

Siniffiuteqaruit, akisit, qipiit, qipiip puuiluunniit atorneq ajukkannik tunissuteqarsinnaavutit. Kalaallit Røde Korsiata Ilulissani atornikuerniarfianut saaffiginnissinnaavutit.