Unnerluussisussaatitaasoq Ikuallatsitsisumut eqqartuussut sakkukinnerutinniarparput
Arnaq ikuallatsitsisoq, inissiaminik Nuummi Qinngorpumiittumi ikuallatsitsinini pissutigalugu ukiumi ataatsimi pinerluuteqarsimasunut inissiisarfimmiittussanngortinneqarluni pingasunngornermi eqqartuunneqarpoq. Sermersuup Eqqartuussiviata taamaalilluni unnerluussisussaatitaasut arnap ukiumi ataatsimi pineqaatissinneqarsimasunut inissiisarfimmiinnissaanut piumasaqaataat malippaa.
Ikuallannermik pilersitsisumut pineqaatissiissutigineqartoq sivikitsoq unnerluussisussaatitaasup, Robert Rafnip oqaatigaa, unnerluussisussaatitaasulli suliami pissutaaqataasut pingaaruteqartut tamarmik, arnallu inuttut atugarisai tunngavilersuinermi atorneqarput.
- Arnap inuttut atugarisai aallaavigalugit taamaalioqqissinnaaneranut takussutissaqanngilaq. Taamaammat inuttut atugarisai aallaavigalugit ukiumi ataatsimi pineqaatissinneqarnissaa anguniarparput, Robert Rafn oqarpoq.
Ilanngullugulu oqaatigaa pinerlunneq sakkortusoq, arnallu Qinngorpumi quleriiaanik inissialimmi inigisani ikuallatsimmagu tamanna inuppassuarnut navianarsinnaanerarlugu.
- Inissianut pigineqartunut ikuallatsitsinermi suliaq sakkortuvoq. Pinerluuteqarnerli inuttullu atukkat oqimaaqatigiissaarneqartussaapput. Arnaq ilinniartuuvoq tamanna arnap inuunermini ingerlariaqqinnissaanut uagut tunngavilersuutigaarput, Robert Rafn oqarpoq.
AAMMA ATUARUK Arnaq ikuallatsitsisutut eqqartuunneqartoq
Unnerluussisussaatitaasoq naapertorlugu arnaq inissiamini siniffimmut pilluni pujortartilluni sinilersimalluni eqqartuussivimmi oqaluttuaraa. Unnerluussisussaatitaasut tamanna arnap piaaraluni ikuallatsitsimasutut ilisimannittup nassuiaataa tunuliaqutaralugu nalililiiffigaat.
Unnerluussisussaatitaasut arnap ukiumi ataatsimi pineqaatissinneqarsimasunut inissiisarfimmiitinneqarnissaanut tunngavilersuutaat Sermersuup Eqqartuussiviata malinniarlugu pingasunngormat aalajangerpaat.
Arnap maanna qaammatini marlunni affarmilu tigummigallarneqareerpoq, piffissaq taanna pineqaatissiissutaanut ilanngaataassaaq. Tamatuma saniatigut pineqaatissiissutip ingerlanerani misiligutaasumik iperagaasinnaanissamut periarfissaqarluni.
