Ikuallatsitsisimasutut pasisaq pinngitsuutinneqarpoq
Angut, illumik, inuit pingasut -a rnap, angutip meeqqallu ataatsip - isersimaffigisaannik, februaarip qaammataani ikuallatsitsisimasutut pasineqarluni tigusarineqarpoq. Inuit pingasut taakkua ikuallannermi tamarmik toqupput.
Suna ikuallassutaalersimanersoq paasiniarlugu Danmarkimi Rigspolitiit aallartitaat uppernarsaatissanik Ammassivimmut katersuiartoreersut paasineqarpoq, ikummatissaq imerpalasoq ikuallatsitsissutaasimasoq, politimesterimut tullersorti Morten Nielsen ilisimatitsivoq.
Angut Nanortallip eqqaani Ammassivimmeersuusoq Qaqortumi eqqartuussaanissami tungaanut Nuummi Pineqaatissinneqarsimasunut Inissiisarfimmiippoq. Eqqarsartaatsimigut misissorneqarnerani paasineqarpoq nalinginnaasumik pineqaatissinneqarsinnaasoq.
Eqqartuussisup Qaqortup Eqqartuussiviani ippassaq eqqartuussinermi angut pinngitsuutippaa, angutip piaaraluni februaarimi ikuallatsitsisimaneranut uppernarsaatissaqanngimmat.
Angut 35-inik ukiulik Qaqortup Eqqartuussiviani pinngitsuutinneqarami erngerluni iperagaavoq.
Pinngitsuutitsineq unnerluussisut, tassa politiit, naammaginngilaat, taamaattumillu suliaq Nunatta Eqqartuussivianut ingerlateqqillugu. Unnerluussisut piumasarisimasaluarpaat angutip ukiuni qulini pineqaatissinneqarsimasunut inissiisarfimmiinnissamik eqqartuussaanissaa.
