Ikuallatsitsisimasutut pasisaq eqqarsartaatsimigut misissorneqassaaq
Angut Ammassivimmi februaari qaammataagaa inuit pingasut inuunerannik naleqartumik ikuallatsitsisimasutut pasineqartoq, eqqartuussaatinnani eqqarsartaatsimigut misissorneqassaaq.
juunip 01-at 2010 09:41
Angut, februaarip qaammataani illumik inuit pingasut, tassalu arnap, angutip meeqqallu isersimaffigisaannik, ikuallatsitsisimasutut pasineqarpoq. Inuit pingasut taakkua ikuallannermi tamarmik toqupput.
Suna ikuallassutaalersimanersoq politiit maanna eqqoqqissaartumik oqaatigisinnaanngilaat. Teknikkikkut misissuinerit akissutaat paasissutaasussat suli takkussimanngillat.
Danmarkimi Rigspolitiinit aallartitat uppernarsaatissanik katersuiniarlutik siusinnerusukkut Kalaallit Nunaanniipput. Taama politimesterip tullia Morten Nielsen oqaluttuarpoq.
Angut Ammassivimmeersuusoq maanna Nuummi Pineqaatissinneqarsimasunut Inissiisarfimmiippoq, taassuma eqqarsartaatsimigut misissuiffigineqarneranit akissutissat oqartussaasunit utaqqineqarlutik.
