Ikuallannermut atatillugu Nuummi politiit ujaasipput
Nuup ilaani Nuussuarmi pisiniarfiit ilaata Mini Markedip eqqaani containeri ippassaq unnulaannguaq ikuallappoq, politiillu tamatumunnga atatillugu angut kalaalerpasissoq ujaaraat, ikuallanneq aallartissimatsiartoq tamaanngaanniit arpattoq takuneqartoq.
septembarip 23-at 2009 16:53
Angut 25-t-30-t missaanni ukioqassangatinneqarpoq, immaqaluunniit ukiukinnerulluni. Saluttuuvoq, 175 centimeterinik 185 centimeterinilluunniit angissuseqassangatinneqarpoq, naatsunik qernertunik nujaqarluni, kakkivissamigullu umeqarluni. Qaqortumik qernertunik toorneerartalimmik naatsumik kavaajaqarsimavoq, qernertunillu qarleqarluni.
Nuussuarmi Atuarfiup eqqaani containeri sapaatiummat aamma ikuallassimavoq, Nuummilu politiit tassunga atatillugu suli aamma misissuipput.
Inuit angummik ujaarineqartumik takunnissimasinnaasut, imaluunniit Nuussuup Atuarfiata eqqaani ikuallannermut ilisimannissinnaasut Nuummi Politiinut saaffiginneqquneqarput, oqarasuaat tassaavoq 32 14 48, tassa 32 14 48.
