Ikuallannermit eqqugaasut inigisamut akiliisinneqassapput
Inimi naneruutit pissutaallutik Qullilerfimmi tallimanngormat kingullermik annertuumik ikuallattoqarpoq. Inissiaq ikuallattoq piffissami sivisuumi inigineqarsinnaajunnaarallarpoq innermit putsumillu ajoqusingaatsiarsimanini pissutigalugu.
Ikuallannerulli inissiat allat pingasut aamma eqqorpai taakkunani putsumik pissuteqartumik inissiat ajoqusermata najugarineqarsinnaajunnaarallarlutillu. Taamaakkaluartoq inissiaatileqatigiit Iserit najugartut inigisamut akilersuinerat ingerlaannassasoq piumasaraat.
- Najugaqartut inissianni akunnittarfittut atorneqartuni najugaqarallarnissamut neqeroorfigineqarput, inigisamullu akilersuinissaat piumasaraarput inissiamik taartaagallartussamik neqeroorfigineqarmata, inissiaateqarfimmi Iserimmi pisortaagallartoq Torben Kortegaard KNR.gl-mut oqarpoq.
Ikuallanneq qameriitsiaannartoq qatserisartut paasivaat inimi naneruutit annertuumik ikuattoqarneranut aallarniutaasimasut ikuallannerlu ima annertutigaaq inneq igalaaniit anillassimalluni.
- Suli aalajangiiffiginngilarput mianersuaatsumik innermik atuisimasutut unnerluutiginnittoqassanersoq. Tamanna inatsisilerituunit misissorneqareerpat aatsaat isummerfigineqassaaq. Kisianni mianersuaatsumik innermik atuisut akiliisineqarsinnaapput, Nuup politiivini vicepolitikommisæri Niels Nyvang KNR.gl-mut taama oqarpoq.
