Ikuallannermi pasilliissanerlutik politiit isumaliutigaat
Innaallagissiorfitoqqaq qaliata ussissarsarneqarnerani ikuallanneq aallartippoq. Ikuallannerlu ima annertutigisimavoq innaallagissiorfitoqaq atorsinnaajunnaallaartutut Nukissiorfinnit nalunaarutigineqarluni.
- Ikuallannermut atatillugu pasilliuteqassanerluta suli isummerfiginngilarput. Qatserisartut nalunaarusiaat takkuteriarpat tamanna isummerfigiumaarparput. Tassani isummerfigissavarput inuk imaluunniit suliffeqarfik pasillissanerlugu, Qaasuitsumi politiit pisortaat Poul Petersen KNR-mut pingasunngornermi ullup qeqqa oqarpoq.
Innaallagissiorfitoqaq illoqarfimmi innaallagissamik pilersuinermut siammaasarfittut atorneqaraluarpoq. Ikuallanneq innuttaasunut sunniuteqarsinnaavoq.
- Iluliarmiunut sunniutigisinnaasaa tassaavoq innaallagissamik pilersuinerup qaminnerani ikeqqinniarnerata sivisunerulersinnaanera. Tamatumunnga pissutaavoq nakkutilliinermut atortorissaarutip tassanngaanniillu aqqutit ikuallannermi aserorsimanerat, Nukissiorfinni attaveqaqatigiinnermut sulisoq Anja Rosa Qvist oqarpoq.
Innaallagiaq qamittuussappat pilertornerusumik iluarsiiniarsinnaaneq anguniarlugu ulloq unnuarlu sulisunik Nukissiorfinni nakkutilliisoqalerpoq.
