Ikuallaffiup qulaani najugalik: Qangali tippappoq
Kirstine Godtfredsen ikuallaffiusup qulinnguani inissiami ilaquttanilu najugaqarput, ikuallattoqalerneralu ima oqaluttuaraa:
- Tipittoqartoq ippassaq naamavarput, sapaatilli-akunnera sinnerlugu naamareernikuuarput arlaannik tipittoqartoq ajortoqartorlu. Ledningit inigisatsinniittut misissorpavut, ajortoqarneranilli nassaarnata. Taava nukara ippassaq pulaarmat silamut anillallunilu tipittupilussuaq naamaleramiuk ammukarpoq, pujortorlu takullugu, Kirstine Godtfredsen oqarpoq.
Kirstine Godtfredsen qatserisartunik kingorna kalerriiniarluni politiinut sianerpoq, aporfissaqarporli
- Nukkama qatserisartunut sianeqquaanga, uangalu qatserisartut normussaarukkakkit politeeqarfimmut sianerpunga. Politiilli normunik paasiniaavimmut sianeqquaannga, normuallu tassani paasivara. Taava 113-imut sianerpunga, nammineerlunili akisartukkut ilisimatinneqarpunga politiinut sianeqquneqarlunga. Qatserisartut kingorna takkupput, Kirstine Godtfredsen oqarpoq.
Ikuallassunnittoqartarnera Godtfredsenikkut sapaatip-akunnerata siulianili naamasalersimavaat, pulaartutillu aamma naamasaqartarsimallutik. Ikuallaffiusinnaasorli nassaarisinnaasarsimanngilaat.
Taava ikuallattoqalerpoq. Ikuallalermat qanoq eqqarsarpit?
- Unnuakkut ikuallattoqarsimasuugaluarpat qanoq iliorsimassagaluarnerpugut. Tuparujussuassagaluarpugut paatsiveerunneqassagunaraluarlunilu. Kisianni takorlooruminaappoq qanoq qisuariaateqarsimassagaluarnersugut. Meeqqammi sinittarfiat ini ikuallaffiusup qulinnguaniippoq. Toqqissisimananngilaq. Assut eqqarsarnarpoq: Iluamik iliuuseqarsimanerpat? Ini atitsitsinniittoq ilumut taamatut atorneqassava? Kirstine Godtfredsen aperivoq, ini ikuallaffiusoq innaallagissamik pilersuivittut atoneqassanersoq apeqquserlugu.
Ilaqutariit sisamanik meeraqarput. Angajulleq aqqanernik ukioqarpoq, nukarllerlu marlunnik ukioqarluni.
Ikuallattoqaleraluarnerani inunnik ajoqusertoqanngilaq.
Qanoq isilluni ikuallattoqalersimanersoq, Nuummi politiit oqaatigisinnaannginnerarpaat, maannali misissuileruttorlutik.
