Immikkut ilisimasalik: Ikuallaavinnut aningaasaliiniarneq alloriarneruvoq pitsaasoq

Nunatsinni kommunit ikuallaavinnut nutaanut marlunnut 400 million koruuninik aningaasaliiniarput. Tamanna inuiaqatigiinnut avatangiisinullu aaqqiinerussaaq ajunngitsoq, nunatsinni eqqakkat passunneqartarnerinut tunngasunik immikkut ilisimasalik naliliivoq.

Nuummi Sisimiunilu ukiut sisamat qaangiuppata nutaanik ikuallaaverujussuaqalissaaq.
Eqqakkat Nuummeersuinnaat Sisimiuneersuiinnaallu passunneqartassanngillat, sinerissami tamarmeersut passunneqartassapput.

Ikuallaavissanut 400 millionit koriuuninik aningaasaliisoqassaaq. Aningaasat amerlagineqarsinnaagaluartut aallaavittut nunatsinni eqqakkat passunneqartarnerinut aningaasaliineruvoq ajunngitsoq, Rasmus Eisted civilingeniøritut ilinniagaqartoq Kalaallit Nunaannilu eqqakkat passunneqartarnerinut immikkut ilisimasalik naliliivoq.

AAMMA ATUARUK Eqqaavissuit ammaannartut atorunnaassavagut

-  Nikeriarnerujussuussaaq ajunngitsumullu alloriarnerujussuussalluni, taanna oqarpoq.

Pingaartumik pinngortitaq pineqartillugu pitsanngoriaataassaaq, putsunut gassinnguuttunut saligutit nutaaliat iluaqutaassallutik.

Rasmus Eistedip isumaa napertorlugu ullumikkutut ingerlaannartoqarsinnaanngilaq.

- Pinngitsoorani arlaatigut qanoq iliuuseqartoqartoqartariaqarpoq, eqqakkat amerligaluttuinnarput pisariunerulerlutillu, oqarpoq assersuutigalugu elektronikkit, sanaartornermit eqqakkat eqqakkallu akuleriiaartut innersuussutigalugit.   

Esani A/S-mi pisortaq Frank Rasmussen siusinnerusukkut assinganik KNR-imut saqqummiussinikuuvoq.

 

Ikuallaaviit akisuut naammanngillat

Taamaakkaluartoq ikuallaavittaassat nutaat marluk pillugit apeqqutinik akissutissarsineqanngitsuik suli peqarpoq.

Assersuutigalugu, eqqakkat illoqarfinni allaniittut qanoq iliorluni Nuummut Sisimiunullu assartorneqartassanersut erseqqissumik pilersaarusiorneqarsimanngilaq.

Aamma eqqakkat navianartut qanoq passunneqartassanersut ikuallaavinnilu qanoq passussisoqartassanersoq ilitsersuusiortoqarsimanani.

AAMMA ATUARUK Nuummi Sisimiunilu ikuallaaviit nutaat illoqarfinni allani ikuallaaviit matussagaat

Eqqakkat elektronikkitaqartut PCB-qartut pisariusumillu passunneqartartut ikuallaavinnilu ikuallatsinneqarsinnaanngitsut passunneqartartussallu qanoq iliorneqarnissaannut unammilligassaqartoq, Frank Rasmussen inerniliivoq.

- Ajornartorsiutit tamakkerlugit ikuallaaviit aaqqinnavianngilaat naak amerlasuunik aaqqiissuuteqartussaagaluartut.

Kommunit aningaasaleeqataassapput

Aningaasaliissutigineqartussat 400 millionit koruunit missaanniittut qanoq pissarsiarineqarnissaannut pilersaarut qaammatini tulliuttuni saqqummiunneqartussaapput.

Pilersaarusiornermi pingaaruteqartunut ilaavoq, suliffeqarfimmut piginneqatigiiffiusumut kommunit aningaasaliinissaannik piumaffigineqarnissaat.  
Kommunillu ingerlatseqatigiiffimmut aningaasaleeqqinnissaannik noqqaassuteqarfiginissaat pilersaarummut tassunga ilaavoq.

Eqqakkanillu ikuallaavinnik marlunnik ingerlatsineq ullumikkutulli akitsuutitigut aningaasalersorneqassaaq. Akitsuutillu taakku kommuninit pissarsiarineqassapput, kommunillu taakku innuttaasut suliffeqarfiillu akileraarusernerisigut pissarsiarissavaat.

- Akitsuutit ullumikkumut naleqqiullugit qaffasinnerunissaat naatsorsuutiginngilarput, Frank Rasmussen oqarpoq.

AAMMA ATUARUK Nuummi eqqakkanik ikuallaavik annertuumik nutarteriffigineqartoq

Ingerlatseqatigiiffiup allatulli sinneqartooruteqarluni ingerlanissaa siunertaanngilaq. ESANI A/S-ilu sinneqartooruteqassagaluarpat, imaassinnaavoq tamanna eqqakkanut akitsuutinik appaanermik kinguneqartoq. Ingerlatseqatigiiffiup isertitai aningaasartuutaalu oqimaaqatigiittussaasut, Frank Rasmussen nassuiaavoq.

Frank Rasmussenp ilanngullugu oqaluttuaraa ikuallaavissat marluk sivisunerusumik atorneqarsinnaasut taakkualu ukiuni 30-ni akilersorneqarsinnaasut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat