Ikuallaavinni sulisut pikkorissarneqarneq ajorput
Hanseeraq Olsen kissaarsuuserisutut ilinniagaqarpoq, taamaattumik ikuallaavimmik oliatortuumik ikitsinissaq nalunngereerlugu sulilerpoq, kisianni ikuallaavimmi suleriaaseq pillugu immikkut ilitsersuunneqarnikuunngilaq.
- Ulloq siulleq suliartorama ilisimaannarpara ikuallaasussaallunga, Hanseeraq Olsen oqarpoq.
Nunaqarfinni illoqarfinnilu inukinnerusuni ikuallaaveeqqat pillugit ilitsersuut Namminersornerullutik Oqartussanit suliaasoq, Hanseeraq Olsenip takusimanngisaannarpaa.
Hanseeraq Olsenip aamma eqqagassanik immikkoortitserinissaq pillugu pikkorissarneqannginnami, eqqagassat ulorianarsinnaasut immikkoortinnissaat nalornissutigisarpaa.
Kangaamiuni ikuallaaveeqqami asattorfiusinnaasumik errorfeqanngilaq erngullu aqqutaanut attaveqarani. Hanseeraq Olsen ikuallaavimmi kisimi sulisarpoq.
- Ilaatigummi ikuallaavimmi tassanngaannarujussuaq qaartoqariasaartarpoq,
taamaattumik tammiffigitittooriataassangaluaruma imaluunniit ooriasaassaguma qanoq iliussanerlunga eqqarsaatigisarpara.
Nunaqarfinni ikuallaavinni sulilersussanut immikkut piumasaqaateqartoqarneq ajortoq, Maniitsumi teknikkemut avatagiisinullu pisortaq Ole Thor Hermansen oqarpoq.
-Ikuallaavinni sulilersussat immikkut pikkorissarsimanissaannik piumasaqaateqartanngilagut, taamaallaalli sulilersussat suliunnaalersunit suleriaatsimik ilitsersuunneqartarnissaat anguniartarparput.
Maniitsumi ikuallaaveeqqani sulisut marluk ukioq manna pikkorissarneqassapput.