Ikuallaaviit mingutsitsiunnaamipput
Avatangiisinut pinngortitamullu pisortaqarfik ukiut pingasut matuma siorna paasivaa nunatsinni ikuallaavinni piumasarisaasut sinnerlugit akuutissamik ulorianartunik aniatisisut.
Paasisaqareernerup kingorna iliuutsit assigiingitsut manna iliuuserineqareerput.
Nunaqarfinni ikuallaavilinni eqqaavilerinermik ilitsersuutit. Nunaqarfinni ikuallaaviit sananeqaataat, allanngortiterneqarnissaanullu periarfissat kiisalu nunaqarfinnit eqqagassat illoqarfinni ikuallaavilinnut assartorneqarsinnaaneri aamma misissorneqarsimalereerput.
Illoqarfiit ikuallaaviisa pujoorfiini akuutissanik ulorianartunik, soorlu dioximik saliisinnaaneq qanorlu akeqarsinnaanerat aamma misissukkat ilagaat.
Ikuallaaviit ikuallaavittut atorneqarsinnaanerisa akuerineqartarneri ukiunut sisamanut sivikillineqartussanngorlugu aamma iliuuseqartoqarpoq.
Igitsisarnermut eqqaavilerinermulluunniit iliuusissat, tassani ilaalluni ikuallaavinni dioxinimik annikillisaanissaq aamma pilersaarusiorneqarpoq.
Ikuallaaveqarnermullu avatangiisigissaanerup inatsisitigut allannguutissai inatsisartuni ukiamut oqaluuserineqassasut, avatangiisinut pisortaqarfimmi immikkoortortami pisortaagallartoq Tina Kreutzmann Petersen radioaviisimut oqarpoq.
Taanna aamma oqarpoq misissuereernermi kingorna iliuuseqarsimallutik, maannalu amigaataaginnalersoq uuttortaanerit qanoq takutitsissanersut, takussutissallu najoqqutaralugit naleqqussaanissaq.
Avatangiisinut pisortaqarfimmi immikkoortortami pisortaagallartoq Tina Kreutzmann Petersen aamma oqarpoq iliuuserisaareersut tunngavigalugit suli uuttortaaqqittoqarsimanngitsoq.
