Ikorfartuisartussanik nunarput tamakkerlugu pikkorissaasoqassaaq

Pikkorissaanerit siullermeerutaasumik ingerlanneqartussat Qeqertarsuarmi aqagu ingerlanneqartussaapput.

Tarnip pissusaanik ilisimasalik, Niels Peter Agger, kiisalu psykoterapeut Elisabeth Wille Qeqertarsuarmut suliartorlutik ikaartaammut ilaallutik avalattut oqarasuaataanni ullaap tungaa pissarsiaraagut.

Elisabeth Wille oqarpoq, Qeqertarsuarmi meeqqanik siornaak atornerluisoqarnerata kingorna sulilluarsimasut ikorfartoriartorlugit, sakkussaannillu tuniorariartorlugit massakkut ornillugit, aammalu pimmatigineqarsimasut ilaqutaalu pisariaqartittippata oqaloqatiginissaannut periarfissaqassasoq oqarluni.

Angalanermi siullermi siunertaagaluarpoq illoqarfiit arlallit anguneqarnissaat, kisiannili Qeqertarsuaq Kangaatsiarlu kisiisa ullut aqqanillit atorlugit anguneqartussaammata, massakkullu angalaneq siulliummat, suliareqqitassatut angerlaassassat qanoq annertutiginissaat apeqqutaassasoq qaqugu sumullu tullissaanni ornigunnissaannut.

Ikorfartuisartut atuarfimmi sulisunit, napparsimaveqarfimmi sulisunit, politiinit, kommunenilu sulisunit inuttalersorneqartartut, pikkorissarnissaat pillugu Elisabeth Wille ima oqarpoq:

-Pikkorissartinneqassapput, taava apuukkutta aatsaat paasissavarput oqaloqatigineqarnissaminnut qanoq pisariaqartitsitiginersut.