Ikkarlinneq: Umiarsuup naalagaa nassuiaasinneqassaaq
Umiarsuaq pajuttaat Vega Sagittarius Nuup avataani Kangerup eqqaani suli ikkarlisimavoq. Sisamanngornermi unnukkut ulinnerani umiarsuaq kaanngartereriaqarluarneqarpoq iluatsinngitsumilli. Taamaammat umiarsuit ajutoorneranni ikiuuttartut ikiortiserineqarput.
- Ilisimatinneqarput mingutsitsisoqarnissaa aarlerinartoqanngitsoq, politimestereqarfimmi allammi pisortaq Claus Lyngholm Risbjerg KNR-mut oqarpoq.
Vega Sagittarius Royal Arctic Linemit attartugaasoq sisamanngornermi ullaakkut ikkarlippoq. Tamatuma kinguneranik nassiussat umiarsuarmiittut Nuummut apuunnissaat kinguaattoorpoq. Royal Arctic Linep maanna sulissutigaa nassiussat kinguaattoortut piaarnerpaamik sineriammut ingerlateqqinnissaat.
Sulili nalunarpoq umiarsuaq pajuttaat qanoq ililluni ikkarlissinnaanersoq imartami ukioq kaajallallugu ajornartorsiutaanngitsumik umiarsuarpassuarnit angallaviusartumi. Royal Arctic Linep umiarsuaatai pajullutik ukiumut 200-riarlutik Nuummukartarput.
- Eqqartuussivimmi imarsiornermi nassuiaasoqassaaq tassanilu ikkarlinnermut attuumassutillit tamarmik nassuiaatinneqassapput, Claus Lyngholm Risbjerg oqarpoq.
Umiarsuaq 139 meterinik takissuseqarpoq 25 meterinillu silissuseqarluni. Useqarani 11.811 tonsinik oqimaassuseqarpoq.
