Ikkami missisukkat uppernarsisippaat kiatsikkaluttuinnarnera

Galathea 3-mik ilisimasassarsiornermi ilisimatuut ilaat, siorna aasakkut nunatsinniittut, misissuinermik inernerisa ilaat tigooralersimavaat.

Taakkua silaannaap kiatsikkiartornera takusinnaavaat. Taamatut oqaluttuarpoq mikro-biologimi lektoriusoq Peter Stougaard, Arsuup eqqaani kangerlummi Ikkami immap naqqani napasunik misissuisimasoq.

Ukiuni kingullerni aqqaneq-marlunni Ikkamiittarnitsinni ukiut tamaasa immap kissatsikkiartornera maluginiartarparput. 90-ikkut qiteqqunneranni Ikkamut peqqaartalernitsinniit naatsorsukkavut naapertorlugit imaq 2 gradinik kissassuseqartaraluarpoq, aasarli uuttukkatta takutippaat 8 gradit angullugit kissassuseqalersimasoq.

Aamma Ikkamut peqqaartaleratta saarulleqanngikkaluarpoq. Siornali saarulliit angisuut kusanartorsuit takkussimasut takuavut. Isumaqarpunga immap kissatsikkiartornera pisuulluni saarulliit uteqqilersut, Peter Stougaard oqarpoq.

Immap naqqani napasut Ikkamiittut immap kissatsikkiartorneranit qanormita sunnigaassappat?

- Naluarput, ajornerpaamilli pisoqassappat kangerlummi Ikkami imaq kissatsippallaarpat napasut immap naqqaniittut peerunnissaat ilimagisinnaavarput. napasut taakkua ukiuni arlalinni peerutissagaluarpata, Kalaallit Nunaat kisimi immikkut ittunik taamaattunik annaasaqarnavianngilaq, nunarsuarmiulli tamarmik annaasaqassapput. Tassami Ikkami kisimi nunarsuarmi immap naqqani napasunik taamaattunik peqarpoq, Peter Stougaard oqarpoq.

Immap naqqani napasut Ikkamiittut bakteerissanik enzyminillu akoqarput, taakkualu peerutissagaluarpata bakteerissat enzymillu taakku nunarsuarmi allani siumugassaanngitsut aammattaaq nunguttussaapput.