Ikiuutit Myanmarimut anngutillattaalerput
Myanmarimut ikiuutissat timmisartoq atorlugu nassiussukkat annguffissaminnut maanna pillattaaleraluartut, ikiuiniaqatigiiffiit mianersoqqussutigaat, ikiuutit tuaviortumik anngutinngippata, tassa illoqarfiit pingaarnersaanni, Yangonimi, timmisartoqarfimmiit ingerlaqqipallanngippata, nunami tassani ajunaarnersuaqarneq suli ajorseriaqqissasoq.
-Timmisartut ikiuutinik usisut Yangonimut tikerartut ima amerlatigaat, oqartussaasut malinnaasinnaanerat killeqalerluni, Dansk Røde Korsimi qullersaq, Anders Ladekarl, ullumi ilisimatitsivoq.
Anders Ladekarl oqarpoq, sakkutuut naalakkersuisut Naalagaafiit Peqatigiit manna tikillugu suleqatigiumanngilluinnarsimagaluarlugit, ikiuutinik timmisartumiit annissuinissaannut maanna akuerisimagaat.
Kiattup anorersua ”Nargis” nunap kujataata kippasissuani sapaatip akunnerani kingullermi pitoraammalli, inuit qassit ajunaarsimanersut sakkutuut naalakkersuisut ullumi kingumut naatsorsorpaat.
Oqartussaasut maanna nassuerutigaat inuit 33.000-it missaat ajunaarsimassasut, naalagaaffimmili atorfillit naatsorsuutigaat ajunaartut ikinnerpaamik 100.000-iussasut.
Ikiuiniaqatigiiffiup Oxfam-ip ullumi mianersoqqussutigaa annaassiniartut ikiuiniaqatigiiffiillu iliuuseqapallanngippata, soorlu nunamut iseqqusaassanngikkaluarpata, Myanmarimi ajunaartut 1,5 millioninngoratarsinnaanerat.
