Ikiuutinik piiaaniarneq akuersaaruminaatsinneqarpoq

Danmarkimi kalaallit ikiuutisiarisartagaannik piiaasinnaanermik oqallittoqarnera, folketingimi ilaasortamit Inuit Ataqatigiinneersumit Kuupik Kleistimit kiisalu Siumumeersumit Lars-Emil Johansenimit akuersaaruminaatsutut nalilerneqarpoq.

- Tupaallannarpoq, naalakkersuisuutitaqartut Konservativet kiisalu Venstret, sulilu tupaallannarnerusumik Socialdemokratit taamat eqqarsarmata, Lars-Emil Johansen oqarpoq, nangillunilu: - inatsisinut atuutsitsinermut ministerimut paasiniarpara, siunnersuut taamaattoq Danmarkip tunngaviusumik inatsisaanut aalajangersakkanut naapertuunnersoq, tassami kalaallit Danmarkip naalagaaffianut naalagaaffeqataasutut inissisimammata. Taamaaliorniarnerlu tunngaviusumik inatsimmut kalaallit pisinnaatitaaffiinik piiaanerummat. Lars-Emil Johansen taama oqarpoq.

Inuit ataqatigiit sinnerlugit folketingimut qinigaasoq Kuupik Kleist isumaqarpoq, siunnersuut piviusunngortinneqarpat, Danmarkip naalagaaffianut kalaallit innuttaaqataanerannik piiaanerussasoq.

- Isumaqarpunga akuersaarneqarsinnanngitsoq. Piviusunngortinneqassappat tassaassooq Danmarkip naalagaaffianut innuttaaqataanitsinnik piiaaffiginninneq, Kuupik Kleist oqarpoq nangillunilu;- taamaalisoqassappat, innuttaasutut pisinnaatitaaffitsinnik piiaaffigineqassaagut. Siunnersuut taamaattoq saqqummiunneqarpat killissaa tikillugu akerlilersussavarput. Taama oqarpoq, Kuupik Kleist.

Kalaallit Nunaata Danmarkimut naalagaaffeqataanera nalilersorneqaqqittariaqartoq, Lars-Emil Johansen aamma isumaqarpoq.

- Taamaattumik isumaqarpunga eqqarsalersitsisariaqartoq. Nunatsinni naalakkersuinermik suliaqartut nalilersoqqittariaqarpaat, tunngaviusumik inatsimmi Kalaallit ilanngutsitaasimanerat allanngortittariaqannginnersoq, allatullu ittumik Kalaallit Danskillu naalagaaffeqatigiinnerata aaqqissuunneqarnissaa, kiisalu tunngaviusumik inatsisip nutaamik aqqutissiuuttariaqalinnginnersoq, folketingimut ilaasortaq, Lars-Emil Johansen naggasiivoq.