Tiilerilaami illumi aallaasersorfiusumi saniliusoq: Ikiuukkusukkaluarpunga
Nunaqarfimmi Tiilerilaami innuttaasut 90-it missaanniittut arfininngormat ullaakkut alianarluinnartumut iterput.
18-inik ukiulik nunaqarfimmi illut ilaannut seqqorsimavoq, tamannalu ajorluinnartumik kinguneqarluni.
Salo Kunuk illumit aallaasersorfiusumit ungasinngitsumi najugaqarpoq – taassumalu annilaarnarluinnartumik pisoqarnera ullaarnganiit malinnaaffigaa.
- Ullaakkut arfineq marluk qeqqa qaangilaaraa sianerfigineqarpunga aallaariartortumik tusaanersugut. Taava makillungalu igalaamukariarlunga takuara aallaariartortoq.
Ikioriartupallanniartigut!
Politiit Tasiilap avannaani nunaqarfimmi aallaasersortoqarnera pillugu 6.42 nalunaarfigineqarput.
Salo Kunuup politiit tikiunnissaanut utaqqinerminni angut aallaasersortoq ammut ingerlasoq umiarsualivimmullu aallerpasittoq takusimavaa.
- Uagutsinnut ernumanartorujussuuvoq saneqquttaqattaarmatigut aamma. Soorluluunniit uagutsinnut sangussasoq uagutsinnulluunniit iserniarsarilissasoq. Annilaanganartorujussuuvoq toqqissisimananngitsorujussuullunilu.
18-inik ukiullip aallaasersulernerata nalaani Salo Kunuk inunnit illumi aallaasersorfiusumit sianerfigineqarpoq.
- Uannut sianeqqilluni oqarpoq; angaa ikioriartupallanniartigut, ilarput niaquatigut aallaatissimavoq.
- Anisinnaannanga ikioriartorusukkaluarlugu qanoq eqqatsinni aallaaserluni ingerlaqattaartoq taama periarmat aniffigineq saperpara aamma uanga, Salo Kunuk oqarpoq.
Pisoq ilungersunartorujussuusoq
Arnaq 36-nik ukiulik angullu 33-nik ukiulik aallaasersortoqarnerani innarlerneqarput.
Kalaallit Nunaanni Politiit angut sapaatiummat toqusimasoq nalunaarutigaat. Arnaq inuunerminik navianartorsiorunnaartoq ilanngullugu paasissutissiissutigaat.
- Ilungersunartorujussuuvoq eqqarmioralugu taama. Nukittuniarnaqaaq annertoorujussuaq tigumminiaraluarpara.
Salo Kunuup nuliani meeqqatik, ernuttatik allallu tukkusut angerlarsimaffimminneeqatigisimallugit oqaatigaa.
Tiilerilaami innuttaasut politiit aggernissaannut illuminniiginnaqquneqarput. Taakkulu sila qaammarmat qulimiuguulimmik tikipput, 18-inillu ukiulik angerlarsimaffimminiittoq aqqarnup eqqaani tigusarineqarluni.
- Eqqissiallannartorujussuuvoq oqariarmata 'tiguaanngooq', Salo Kunuk oqarpoq.
