Ikiuissutissanik apuussuiniarneq Haitimi suli kipiluttunarpoq
Naak nakorsaatissat ikiuiniaqatigiit Læger uden grænser-ikkut atugassaat nunnigunneqarsinnaasut qulakkeerneqartutut oqaatigineqartaraluartoq timmisartoq nakorsaatinik usisoq minnissaa ullumi pingasoriarluni itigartinneqarpoq.
Tassa ikiuiniaqatigiit læger uden grænser-ikkut nakorsaatissaat katillugit 85 tonsit timmisartunit tallimanit usineqartut januaarip ulluisa 14-iannili nunnissinnaasimanngillat, allatullu ajornartumik Haitip sanilianut Dominikanske Republikimut nunnigunneqartariaqarsimallutik.
Haitimilu pissutsit suli ajorsiartuinnarput, ilaatigummi læger uden grænser-ikkut inuit uninngasuutaat tallimat toqoreersimapput, naak nakorsaatissaat timmisartuni, tassa minnissaanut itigartitaasuni, usigineqaraluartut.
Pissutsit taamaattut takusimanngisaannarpakka, Lauri de Filippi oqaluttuarpoq, nangillunilu: Inuit aqqaneq-marluk uumaannassagunik avataat ajoquserujussuarsimasut kipineqartariaqaraluartut ullumi takuakka, allatullu ajornartumik aqqusinermi niuertunut pilattuutisiniartariaqarsimavugut pilattaanerput ingerlanniassagatsigu.
Massakkorpiaq angumanniapiloortorujussuuvugut, Lauri de Filippi naggasiivoq.
Timmisartut marluk ikiuiartortunik 26-nik usisut Dominikanske Republikimut ullumi nunnigunneqartariaqarsimapput.
Ikiorsiissutaareersut qaavatigut Danmark 20 millionit koruuninik aningaasaleeqqippoq, taakkualu arnanut meeqqanullu immikkut atugassanngortinneqarput.
- Neriuutigaara nunat allat iliornerput ilaassagaat, Danmarkimi ineriartortitsinermut ministeri, Ulla Tørnæs, oqarpoq. Tassa taamaalilluni Danmark maannamut katillugit 80 millionit koruuninik Haitimi ikiuiniarnermut aningaasaleereerpoq.
