Ikiuiniarluni suligasuarsimaneq imaannaanngitsoq
Ukiut arfineq pingasut qaangiupput Aasianni nukappiaqqanik 27-inik kinguaassiutitigut atornerluisoqartarsimanera paasineqarmat.
Atornerlugaasimasut ilaqutaasullu ikiorniarlugit suliniarnerup aallartinniarnera imaannaasimanngilaq.
Suliami ukiunik pingasunik sivisussuseqartumi Johan Reimer atuarfimmi immikkut atuartitsinermi siunnersortaanermini suliamik ataqatigiissaarisunut ilaavoq. Taassuma oqaatigaa meeqqat atornerlunneqarsimasut pisuunnginnerinik paasitinniartuartariaqartut, inersimasunullu tatiginninnerisa aserorneqannginnissaat pingaaruteqarluinnartoq.
-Annertoorujussuarmik taanna pingaaruteqarpoq, aamma pineqartut kikkunnik tatiginnilluinnarnissaasa ilisimanissaat eqqaamasariaqarpoq, uagullu inersimasut tatiginninnerisa aserunnginnissaat eqqaamasariaqarparput, Johan Reimer oqarpoq.
Johan Reimerip tikkuagaasa ilagaat suliani taamaattuni suliniarnermi sullissisutut tatitigineqarnissaq pingaarutilerujussuusoq. Nukappiaqqanimi pineqartuni avammut tusarliunneqarnissaq imaannaasimanngilaq, tatigineqarluarnissarlu pingaaruteqarluinnarpoq.
-Taamaattumik uagut inersimasut tatigineqarnissarput anguniarlugu nukappiaqqat neriorsortariaqarsimavagut oqaluttuuttariaqarsimallugillu oqaatigisaat kimulluunniit, - angajoqqaavinut, qatanngutaannut, ilinniartitsisuinut, atuaqataannut ilinniartitsisuinulluunniit oqaluttuarisaat oqaluttuariunnarnagit, - atiiluunniit taajunnarnagit, paasigatsigumi ukiuni tulliuttuni marlunni pingasuniluunniit sullittussallutigit, Johan Reimer erseqqissaavoq.
Aasianni ukiunik pingasuni sivisussuseqartumi suliamik misilittagaqarneq maanna Narsami tunaartariniarneqarpoq, aasaq mannalu Narsami nukappiaqqat aqqanillit kinguaassiutitigut atornerlunneqartarsimasut paasineqarnerisa kingorna suliniarneq tassunga assingusoq ingerlanneqarpoq.
Aasianni suliniarsimaneq pillugu Johan Reimer naliliivoq suliniarneq taamaattoq iluatsilluarsimasoq:
-Uanga allatut nalilersinnaanngilara, allatut iliorsimanngikkaluarutta naloqaara ullumikkut nukappiaqqat taakkua ajornartorsiutit suut atussaneraat. Nalunngilarpulli ullumikkut uagut sullissisimasugut eqqartoraangatsigu nuannaartarpugut qanoq kiinnertarnerat nuannersoq takusinnaagatsigu, - naak tamarmik taamaanngikkaluartut, ilaat ammasorujuupput, aammalu ikiuukkusuttaqaat taama pisunik takugaangamik, Johan Reimer naggasiivoq.
