Ikiuiniaqatigiiffiit tapersersorluarneqarput
Ikiuiniaqatigiiffinnut aningaasaliinerit aatsaat taama amerlatigisut, ikiuiniaqatigiiffiit kattuffiata misissuinerani paasinarsivoq. Aningaasaliinerit 2005-imiit 2009-p tungaanut 9 procentinik amerleriarsimapput. Aviisimi Kristeligt Dagbladimi tamanna atuarneqarsinnaavoq.
Naak aningaasat naleerukkiartornerat matumani aamma eqqarsaatigineqareeraluartoq ikiuiniaqatigiiffiit ilaat aningaasaqarniarnikkut ingerlalluarput.
Aningaasat ukiumut 6 milliardit koruunit ikiuiniaqatigiiffinni kaaviiaartinneqarput. Aalajangersimasunik aningaasaliisoqarnissartik ikiuiniaqatigiiffiit pikkoriffiginerulersimavaat, tamannalu ilaatigut pissutigalugu aningaasaqarniarnikkut ingerlallualersimallutik.
Assersuutigalugu inuttut pisinnaatitaaffinnik illersuiniaqatigiiffiup Amnesty Internationalip ilaasortani, ukiut tallimat ingerlanerini quleriaammik amerleriartissimavai.