Ikiuigasuartussanik Upernavimmi pisariaqartitsipput

Upernaviup kommuniata Isumaginninnermik immikkoortortaqarfiata pisortaata, Dariusz Sobczynski-p nalunaarutigaa, Upernavimmi meeqqat marluk inersimasullu pingasut umiatsiamik ajunaarnerisa kingorna, Namminersornerullutik Oqartussani Ilaqutariinnermut Pisortaqarfimmut saaffiginnissuteqarsimalluni, ajunaartut ilaqutaannik ikiuigasuartussanik Upernaviup kommunianut ikiuukkiartoqqullugit.

Dariusz Sobczynski-p nalunaarutigaa ilaqutaasut ikinnerpaamik 18-it ikiorneqarnissaminnik pisariaqartitsisut. Ujaaseqataasulli qulit missaanniittut aamma oqaloqatigineqarnissaat pisariaqassasoq Dariusz Sobczynski-p ilimagalugu aamma nalunaaruteqarpoq.

Kommunimi inunnik isumaginnittoqarfik, Upernavimmi napparsimavik, politiillu suleqatigalugit ikiueqqaarneq aallartereersimavaat. Feriartoqarnerali peqqutaalluni sulisut tallimat missaannaaniimmata, qanittukkut ikiueqqaartut avataaniit ikiorneqarnissat pisariaqartinneqalissasoq ilimagineqarpoq. Sulisut arlallit panigiit toqutaanerata kingorna aamma ikiueqqaartunut ilaasimammata.

Isumaginninnermik immikkoortortaqarfiup kissaatigaa, Upernavimmi toqutsisoqarnerata kingorna kalaallit marluk ikiuartorsimasut, Upernavimmi pissutsinut ilisimasaqalereersut, Upernaviliartinneqarnissaat,

Peqqinnissamik nakkutilliisup Knud Brinkløv Jensen-ip Kystledelse-milu nakorsaanerup Jens Otto Veje-p Upernavimmut ikiuartortoqartitsinissaa tapersermassuk.