Ikiuiartortitat isersinnaanissaat piumavaat

Nunat killiit USA siuttuliullugu, Myanmarimi sakkutuunut naalakkersuisuusunut sakkortuumik peqqusipput, ikiuiartortitatik ajornaquteqanngitsumik nunap ilaanut ajunaarnersuaqarfiusunut isersinnaatissagaat.
maajip 26-at 2008 07:44

Anorersuup kaavittuliortup Nargis-imik taagukkap, maajip aappaani Myanmar eqqormaguli angerlarsimaffeeruttut nerisassaaruttullu 2,5 millionit ikiorniarnerat ajornakusoorsimaqaaq, tamanna ikiuiniaqatigiiffiit Yangon-imi ippassaq ataatsimiinneranni saqqummerpoq.

USA-p aallartitaa oqarpoq, Myanmarimi naalakkersuisut ammanerusuuppata maannamut 100 millioni koruunit nalinginut ikiuinissamik akuerisatik qaffassinnaakutsooraluaritsik.

Myanmarimilu ministeriuneq Thein Sein eqqarsarniarallarpoq.

Naalagaaffiit Peqatigiit naliliipput ikiortariallit sisamaagaangata taakkunannga pingasut maannamut sunnguamilluunniit ikiorserneqanngitsut.

Annilaanngatigineqarpoq perlertut nappaatillu peqqinnartumik nerisassaqannginnerup pilersittagai siaruaatipiloorsinnaasut, ikiuiniarluni sukkasuumik iliuuseqartoqanngippat. Myanmarimi Burma-tut ilisimaneqarnerusumi inuit 134.000 ajunaarsimanissaat naatsorsuutigineqarpoq.