Ikiueqqaarsinnaasut ikippallaaqaat

Ikiueqqaarnermut pikkorissartoqassagaangat suliffeqarfillu pikkorissaasinnaasumik piareersimasoqarpat, Kalaallit Røde korsiat suleqatigalugu pikkorissarnissamik aaqqissuussisoqartarpoq.

Kalaallit Røde Korsiata siulittaasua Marianne Jensen isumaqarpoq, ikiueqqaarnermut tunngatillugu innuttaasut ilisimasaqarnerusariaqartut.

- Tassami sumiluunniit silarsuarmi nalunngilarput, qanoq ilisoqariaannaasarpoq, nunatsinnilumi angalaartaqaagut, illoqarfik napparsimaveqarfillu qanoq ileriataaraluaraanni imaaliallaannaq tikinneqarsinnaanngitsunik. Taamaattumik pingaaruteqarpoq, uagut nunatsinni taamak angalasartigaluta asiartartigaluta qanoq ilisoqariataarnerani qanoq ililluta pitsaanerpaamik ikiuisinnaanerput ilisimassallutigu, Marianne Jensen oqarpoq.

Taanna nangilluni nassuiaavoq ikiueqqaarnermut pikkorissarnissamut neqeroorutaasartut nalinginnaasut, saniatigut allanik aamma pilersaarusiorsimallutik.

- Kalaallit Røde korsianninngaanniit neqeroorutaasartut nalinginnaasut pikkorissarnermut 24 tiimiusut, taassuma saniatigut nutaanik aamma pilersaarusiornikuuvugut, ukiup kingulliup ingerlanerani. Tassani suli siammasinnerusumik periarfissiiniarluta allanik aamma neqeroorutinik saqqummiussiniarluta pilersaarusiornikuuvugut. Taama pilersaaruteqarnitsinni ilaatippagut suliffeqarfinnut pisariaqartitaat naapertorlugit pikkorissartitsisinnaanerit 12 tiimit. Kiisalu aamma meeqqat atuarfiannut tulluussakkamik sanatitsisimavugut, tassa meeqqanut 4. klasse-mi atuartunut naleqquttumik pikkorissartitsinermut 3 tiiminik sivisussulimmik piareersaasimalluta, Marianne Jensen oqarpoq.

Taanna apereqqipparput, meeqqat atuarfiini aammalu inersimasut atuarfiini ikiueqqaarnerup ataavartussamik faagitut ilaatinneqannginnera qanoq isumaqarfigineraa.

- Nalunngilara massakkut periarfissaasoq, soorlu oqareersunga maluginiarparput soqutiginninneq alliartortoq, taamaattuminguna immikkut atuarfimmut tulluarsakkamik sanasugut. Taassumalu saniatigut inerisaavik qanittumi oqaloqatiginikuuara, tassuunakkut aamma meeqqat atuarfianni atuartitsinermi siunnersorteqarfik oqaloqatigalugu, tassuunakkut qanoq ililluta suleqatigiinnerusinnaalluta eqqartorparput, naatsorsuutigaara aqagu Røde korsimi ataatsimeeriarutta taakkua saaffiginnissutaat aamma eqqartussallutigu, Kalaallit Røde Korsiata siulittaasua Marianne Jensen taama oqarpoq.