Ikiueqqaarneq nunatsinni ilisimaneqanngippallaarpoq

Ikiueqqaarneq nunatsinni ilisimaneqanngippallaarpoq, taamalu ilinniarfinni amerlaqisuni aamma ilinniartitsissutigineqarneq ajorpoq.

Silamiillutit uummatinnik unittooraluaruit qularutigisinnaanngilat, naapitavit eqqanniittulluunniit ikiueqqaarneq atorlugu ikiorsinnaassagaatsit.

Tassami, nunatsinni innuttaasut amerlaqisut ikiueqqaarnermik ilinniarsimanngimmata.

Atuarfitsialak ukiut marluk matuma siorna pilersinneqarmat siunniunneqarpoq, ingerlaavartussatut siunniutinngikkaluarlugu, atuartut 7. klasse-nngunnginnerini ikiueqqaarnermik ilikkagaqareersimassasut.

Taamatuttaaq sinerissami inuusuttuaqqat atuarfiini GU-mi, Niuernermullu ilinniarfimmi aammalu Inunnik isumaginnittunngorniat ilinniarfianni ISI-mi faagitut ilinniagassatut ikiueqqaarneq ilaatinneqanngilaq.

Aammattaaq peqqissaasutut ilinniarsimasoq maanna Nuummi angerlarsimaffinni ikiortit allaffeqarfianni ningiuusoq Elga Kristensen oqarpoq, angerlarsimaffinni ikiortitut sulisorisamik affaat ilinniarsimanngitsuusut, taamalu ikiueqqaarnermik ilinniarsimanatik.

- Ataatsimut isigalugu, isumaqarpunga, inunnik sullissisut kikkulluunniit ikiueqqaarnermik ilisimasaqartariaqartut, taamatuttaaq sulisut ikiueqqaarnermik pikkorissartinneqartuartariaqartut, kisiannili ajoraluartumik taamaattoqanngilaq, Elga Kristensen oqarpoq.

Nuummi naluttarfiup Maliup ittuata Calle Tøtruppip oqaatigaa, naluttarfimmi sulisut ikiueqqaarnermik ilinniartinneqartartut, erseqqissarpaalu ilinniartitsisarnitik soqutigineqarluartartut.

- Inuit akornanni suliffeqarfinnilu ilisimaneqaleriartorpoq, ajutoortoqartillugu ambulance-p takkunnissaata tungaanut ikiuigasuarnissaq qanoq pingaaruteqartigisoq, Calle Tøtrup oqarpoq.

Taanna isumaqarpoq, suliffeqarfinni annerusuni tamani uummammik unittoortoqartillugu aallartitsissut pigineqartariaqartoq. Taama ittoq maskiinaq inummik annaassigasuarsinnaavoq, suliffeqarfinnilu tamani pinngitsoorani pigineqartariaqaraluarluni, Calle Tøtrup oqarpoq.