Ikiorsiissutit tunniutiinnartannginnerat ikilisaataavoq
Aasiaat kommuneani ukiup affaani siullermi suliffissaaleqisut ikilisimanerannut pisortatigut ikiorsiissutit tunniutiinnarnagit suliffissaqartitsiniarnermi suliniutit assigiinngitsut aallartisarneqarsimanerat pissutaaqataavoq.
- Kommunalbestyrelsep pisortatigut ikiorsiissutit tunniutiinnartakkat pitsaanerusumik atorneqarnissaat siunniunnikuuaat. Tamannalu toqqammavigalugu suliffissaqartitsiniarnermut suliniutit assigiinngitsut aallartisarneqarsimapput.
Erik Sivertsenip aamma oqaatigaa piginnaanngorsaqqinnermut isumaqatigiissusiortoqartartoq, qanoq suullu atorlugit piginnaanngorsaqqinnissaq pilersaarusiorneqartarluni.
Suliffeqarfiit namminersortut aamma aperineqartarput piginnaanngorsaqqittumik sulisoqarusunnersut. Piginnaanngorsaqqittut, kommunemi sullissisumit sapaatip akunneri tamaasa attavigineqartarput, killiffiannik oqaloqatigalugit, taamaalillutillu malinnaavigeeqqissaarneqartarlutik.
Taakku saniatigut ilinniaqqiffissat eqqarsaatigalugit, meeqqat atuarfianni nalinginnaasumik annertusisamillu atuarnissaq periarfissiuunneqartarpoq, taamaalillutik piginnaanngorsaqqittut ilinniaqqinnissaminnut periarfissaqarlutik.
