Ikiorsiissutit peerniarneqarnerigaluat unitsinneqarpoq

Suliffissaqarnermut ministerip Claus Hjort Frederiksen-ip inatsisinullu ministerip Lene Espersen-ip kalaallinut Danmarkimi najugalinnut qallunaatullu oqalulluarsinnaanngitsunut ikiorsiissutit peerniarneqarnerigaluat unitsippaat.

Ministerit feriarneranni ikiorsiissutit Socialdemokratinit, Konservetivinullu peerniarneqaraluarput. Venstre-t isummamut avissaartuupput, Dansk Folkepartiillu akueriumanngilluinnarpaat. Enhedslisten sulisoqarnermut ministerimut nassuiaaqqusillutik piumasaqarput, Lars-Emil Johansen-ilu inatsiseqarnermut ministerimut pisoq pillugu saaffiginnissuteqarpoq. Ministerillu marluk akissuteqaataat kiisami takkupput.

Claus Hjort Frederiksen-ip akissuteqarnermini oqarpoq, inuiaqatigiit akornanni qallunaatut oqalulluarsinnaanngitsunut ikiorsiissutit peerniarneqarsinnaanngitsut.

-Taamaammat ikiorsiissutit peerneqarsinnaanngillat, isumagalu malillugu aamma kalaallinut qallunaatut oqalulluarsinnaanngitsunut ikiorsiissutit peerneqassanngillat.

Inatsisinut ministerip akissummini aamma oqaatigaa kalaallinut qallunaatut oqalulluarsinnaanngitsunut ikiorsiissutit peerneqarsinnaanngilluinnartut, aamma ammit pillugit assigiinngisitsinnginnissaq pilersuinissamullu inatsit, inatsisinut tunngaviusuni allaqqasut inatsisinut ministerip allaffiata akissuteqaatimini innersuussutigimmagu.