Ikiorsiissutit ilatsiinnarniutaassanngillat

Illoqarfinni taakkunani marlunni aalisakkanik suliffissuarni sulisussaaleqineq pissutigalugu, ilaatigut Royal Greenlandip aalisakkat suliarineqanngitsut nunanut allanut nassiussuuttariaqartarpai.

Tamatuma peqatigisaanik Qaasuitsup Kommuniani suliffissaaleqisut amerlapput, tamatumalu kinguneranik aningaasat ikiorsiissutigineqartartut amerliartuinnarlutik, Anda Uldum allappoq.

- Suliffeqarfiit sulisussaaruttarnerat pissusissamisuunngilaq, taamaattumillu kommunip akileraarutit annissuinnarneqartut isiginnaaginnarlugit, uffalu nammineq isumaginninnikkut aningaasartuutinik nammakkersorneqarluni, Demokraatit oqaaseqartartuat isumaqarpoq.

Taamaattumik kommunit tungaannit isumaginninnikkut ikiorsiissutit atorneqarnerisa maleruagassiornerat sukateriffiginiarneqaraluarpat, Demokraatit paasilluarsinnaassagaluarpaat.

- Suliffissamut innersuunneqartumut itigartitsigaanni aamma isumaginninnikkut ikiorsiissutinut itigartitsinertut isigisariaqarpoq, Anda Uldum allappoq.

Taamatulli inissisimasoqarnera nuna tamakkerlugu atuummat Demokraatit isumakulunnartutut isigaat. Kalaallit Nunaanni suliffiit inuttassarsiukkat naammattuugassaapput, tamannali ilutigalugu sumi tamaani suliffissaaleqineq naammattuugassalluni.

Demokraatit isumaqarput, inuit suliffissanik tigusisinnaanngorlugit piukkunnarsaqqinneqaraluarpata annertuumik iluaqutaassagaluartoq, taamaalilluni inuit ikiorneqaannarunnaarlutik namminneerlutik imminnut pilersorsinnaanngussagaluarmata.

- Tassami imminut napatilernissatsinnut tamanna aqqutissaavoq, Anda Uldum naggasiivoq.