Ikiorsiissutit ilaat anngussinnaanngillat
Nanngutillumi kisimiissanatik; tassami pinerlunniat angerlarsimaffeeruttunut qunusaarillutillu inupiluuserniartarput.
Qulimiguullit timmisartullu Haitimut tikeraleruttorput. Ikiuiartortut tikiussortut nakorsaatit nunarsuarmit tamaneersut aamma tikiussorneqarput.
- Pissutsit ajortikkiartuinnarput sulilu taamaassagunarlutik, FN-imi suleqataasoq oqaluttuarpoq inuillu imissaqarnatillu nerisassaqannginnerarpai.
Ikiorsiissutit timmisartunik tikiussuunneqaraluartut pisariaqartitsisunut 100.000-ilikkuutaanut anngunnissaat ajornakusooqaaq. Aqquserngimmi pitsaanngereeqisut nunap sajunneranit aqqutissaajunnaarlugit aseroluinnarneqarsimapput taamaammallu nunami angalaniarneq ajornarluinnangajalluni.
Pinerlunniarneq nunap sajunnginneranili annertoreeqisoq suli ingasanninngorpoq quersuillu ikiorsiissutinik ilioraaffigineqartut pinerluttunit tilligarfigineqarlutik.
Haiti pinerlulluni akilersittarnermik nunarsuarmi ajornartorsiorfiunerpaavoq. Taamaammallu ikiorsiissutit tikiussuunneqartut kikkunnit tamanit pagganneqarput. Pinerluttuinnanngitsut aammali naalakkersuinermik suliallit ikiorsiissutit agguaanneqarnissaanni salliuniarsaripput. Taakku inuiaqatiminnit tapersersorneqarnerulernissartik pillugu imminnuinnaq eqqarsaatigalutik taamaasiorput.
Haitimi nunap sajunneranit eqqugaasunik Danmarkimi ikiuiniarluni SMS-ikkut katersuiniarneq millionilikkuutaanik isaatitsiviuvoq. Qallunaat ikiuukkumatunerat ikiuiniaqatigiinnit qujamasuutigineqaqaaq. Haitimili innuttaasunut eqqugaasunut 3 millioninik amerlassuseqartunut ikiuiniarneq sunniuteqassappat aningaasanik suli amerlanernik pisariaqartitsisoqartoq nalunaarutigineqarpoq.
Danmarkimi Røde Korsi Unisef-ilu maannamut 6,7 mio. koruuninik ikiorsiissutinik nunap sajunneranik eqqugaasunut atugassanik pisimapput. Isaatitallu piffissap ingerlanerani suli amerliartuinnarput.
Ikiuiniarnermi pisariaqartinneqarnerpaanut atorneqassapput, tassaasunut, tæppinut, imerfissanut igaffimmilu atortussanut, Røde Korsimeersut oqarput.
Unicef-ip Københavnimi quersuaani ikiorsiissutissat katillugit 40 tonsimik oqimaassusillit maanna poortorneqarput aqagulu Haitimut timmisartuunneqassallutik.
