Ikiorsiissutinik siunissami pissagaanni iliuusissatut pilersaarusiorsimasariaqassaaq
Suliffisaaleqinermi ikiorsiissutinik pisartagaqartarnermut peqqussutissatut Naalakkersuisut siunnersuutaat Inatsisartuni ullumi siullermeerlugu oqaluuserineqarpoq. Peqqussutissatut siunnersuut peqqussummut massakkut atuuttumut taartaassaaq, taannalu naapertorlugu suliffissaaleqisunik ikiorsiisarnermi periuseq allangussaaq. Soorlu suliffisaaleqisut tamarmik immikkut iliuusissatut pilersaarusiorfigineqartalissallutik.
Ikiorsiissutit pillugit Inatsisartut peqqussutissaattut siunnersuut naapertorlugu suliffissaaleqisunut siunissami iliuusissatut pilersaarusiortoqartassaaq, sulisut ataasiakkaat tamarmik iliuusissatut pilersaarusiorfigineqartassapput, pilersaarusiortarnerit kommuneqarfiup suliffissaaleqisullu akornanni suleqatigiilluni immersorneqartassallutik. Ilisuusissatut pilersaarut suliffissaaleqinerup nalaani allatut piginnaanngorsarneqarnissamut atuaqqissinnaanissamut ilinniartitaasinnaanissamulluunniit ilitsersorneqartalernissamik imaqartassaaq.
Peqqussutissatut siunnersuummi taamaattoq erseqqissaatigineqarpoq pilersaarusiortoqassappat suliffissaaleqisoq ikinnerpaamik ullunik 14-inik suliffissaaleqisimasariaqartoq.
Siunnersuut Inatsisartuni ilaasortanit tamanit tunngaviatigut isumaqatigineqarpoq, taamaattorli suliffissaaleqisunik allatut piginnaanngorsaasarnerit pikkorissaasarnerillu tamarmik akeqarmata kommuneqarfinnut akissaatikinnerusunut artukkiinissaat Inatsisartuni ilaasortanit arlaqartunit ernummatigineqarpoq. Inuussutissarsiornermut Naalakkersuisoq Sivert K. Heilmann, tamakku kiap akilissavai?
-Kommuninut akilersinniagaanersoq tikillatsiarneqarpoq, kisianni annertussusileriikkamik ikiorsiisarnerit eqqaamanerlungikkukku 15 imaluunniit 20 millioni koruunit sinnerlugit immaqa aningaasartuutigineqartarput. Tassunga siunertaq akuerineqariarpat atorneqarsinnaaneri eqqarsaatigineqarsinnaavoq, aamma pisariaqartitsisoqassappat suli annertunerusumik aningaasartuuteqarfiussasoq, kommunit kattuffiannik isumaqatigiinniarnerit aqqutigalugit aaqqiisoqarniarsinnaanerat eqqarsaatigereertariaqarivut isumaqarpunga.
Allisartut piniartullu pissarsiorsinnaajunnaarnerminni ikiorsiissutinik pisartagaqartinneqarsinnaanissaat siorna annertuumik oqillisaavoq, peqqussutissatut siunnersuummi taakku sooq ilanngunneqarsimannginnerat Inuussutissarsiornermut Naalakkersuisumut apeqqutigaarput, akivorlu:
- Tassami eqqumiigineqarsinnaavoq aalisartut kattuffiat tusarniaanermi sooq ilaatinneqarsimanngitsoq. Aamma uanga taannartaa takuinnarlugu maqaasisimavara, kisiannili aalisartut piniartullu namminersortutut oqaatigineqartarput, taakkununngalu tunngatillugu misissuinerit suliassallu maanna ingerlapput, kingusinnerusukkullu saqqummiunneqartussaassallutik.
Aalisartunut piniartunullu ikiorsiissuteqartarsinnaaneq pillugu misissuinerit qaqugu naammissineqarnissaat Sivert K. Heilmannip erseqqissumik oqaatigisinnaannginnerarpaa. Ikiorsiissutinik pisartagaqartarnermut peqqussutissatut siunnersuutigineqartup aappassaanneerneqartigani Inatsisartut Inuussutissarsiornermut Ataatsimiititaliaani oqaluuserineqaqqaarnissaa Inatsisartuni amerlanerussuteqartunit kissaatigineqarpoq.