Ikiorsiissutinik pisartagallit juullerpalaartilerpaat
Kommunalbestyrelsep ataatsimiittarfia juullerpalaarfiusussanngorpoq pisortanit ikiorsiissutinik pisartagallit juullerpalaartinneqalerpata pingasunngornermi nalunaaqutaq marluniit.
Ilaqutariit tamarmik immikkut pisissutissamik 500 koruuninik nalilimmik pissarsissapput aammalu meeqqanut tunissutissarsiutissaq 100 koruuninik nalilik meeqqanut tamanut tunniunneqassaaq.
Kommuneqarfik Sermersooq nittartakkamini ilisimatitsivoq pisortanit pisartagallit juullerpalaartinnissaannut kommunerujussuup inoqarfii tamarmik aningaasaliiffigineqarsimasut aaqqissuussinissarlu sumiiffinni ataasiakkaani tungiuinermut immikkoortoqarfiit isumagiumaaraat.
- Nuummi Tungiuinermut immikkoortortaqarfiup aalajangerpaa nerisassanik tunissutinillu pisissutaasinnaasunik agguaasoqassasoq ilaqutariinnullu juullisiortitsisoqassasoq, ilaatigut Leif Immanuelsen aamma Hanne Saandvig aliikkusersuissallutik. Aamma orpiliaq kaavinneqassaaq, soorunalimi juullip inua aggissaaq meeqqanullu mamakujunnik agguaassissalluni, taama Kommuneqarfik Sermersooq nalunaarpoq.
