Ikiorsiissutinik piiaaniarneq akerlilerneqaqqippoq
Kalaallit Danmarkimi najugallit qallunaatut oqalussinnaannginnertik peqqutigalugu sulisinnaanngitsut ikiorsiissutinik pisartagaqartarunnaarnissaannik siunnersuuteqartoqarneranut, Folketingimi Enhedslisten-imi ilaasortaq, sulisoqarnermullu oqaaseqartartoq, Jørgen Arbo-Bæhr, oqallinnermut ilannguppoq.
Siunnersuut Konservativinit Socialdemokratinillu siunnersuutigineqarpoq, nunatsinnilu politikerinit sakkortuumik qisuariarfigineqarluni, aamma Venstre-meersumit, Birthe Rønn Hornbech-imit.
Siunnersuut akuerineqarsinnaanngilluinnartoq, Folketingimut ilaasortaq Enhedslisten-imeersoq Jørgen Arbo-Bæhr oqarpoq.
- Isumaqarpunga kalaallit qallunaanut sanilliullugit pissusissamisuunngilluinnartumik immikkut piniarneqartut, Jørgen Arbo-Bæhr oqarpoq, nangillunilu:
-Ajoraluartumik Danmarkimi inuiaqatigiit akornanni suliniarnerminnik ajornartorsiuteqartoqarpoq. Ilaat Danmarkip kujataaniit takkuttuupput, ilaat Fyn-imiit ilaat Bornholm-imiit ilaallu Kalaallit Nunaanniit. Taakkununngalu immikkut arlaannaannulluunniit maleruagassaliortoqarsinnaanngilaq, Jørgen Arbo-Bæhr oqarpoq.
-Ajornerpaavoq tamakku immikkoortitsiniarnerit assigiinngissititsinermik annerusumik pilersitsisarmata. Inuiaqatigiinni immikkoortiterileraanni inuuniarnermi ajornartorsiutinik annerusunik tamanna aamma pilersitsisarpoq. Kialuunniit tamanna nuannarinngilaa, immikkullu taaneqarnissaq inissinneqarnissarluunniit aamma nuannarineqarani. Taamatut pisoqaraangat inuiaqatigiinni ajortumik sunniuteqartartoq aamma takoreerparput, Jørgen Arbo-Bæhr oqarpoq.
Enhedslisten-iminngaanniit ajornartorsiutinik qaangiiniarnermi marlunnik siunnersuuteqartoqarpoq. Toqqaannarnerusumik ajunnginnerusumillu isumaginninnermi oqartussaasunut suleqatigiinnerulernissaq siullertut anguniarneqarpoq. Aappaattut pingaarutilerujussuartullu anguniarneqarluni, inuiaqatigiinni sanngiinnerusut suliffigisinnaasaannik suliffissanik pilersitsisoqarnissaa, taannalu siunnersuut suliffissaaleqisunut kikkunnulluunniit atuuttoq, Jørgen Arbo-Bæhr oqarpoq.
