Ikiorsiinissartik isumaliutersuutigigaat

Naalakkersuisut tusagassiuutinut nalunaarumminni piniartut avinngarusimasuni najugallit pissaaleqisut tapiissuteqarfigineqarnissaat isumaliutigalugu allapput.
Allattoq Mads Lynge
decembarip 20-at 2007 08:15

Aningaasaliisarnermi tunngavissatigut periarfissaqassappat, Aningaasaqarnermillu Ataatsimiititaliamiit akuerineqassappat Avanersuarmi, Illoqqortoormiuni Ammassallillu kommuniani piniartut tapiissuteqarfiginiarneqarput.

Naalakkersuisut isumaliuteqarnerannut saaffiginnissutit arfinillit tunngavigineqarput.

Siunissami piniartunut ajornartorsiuteqalersunut tapiissuteqartarnissamut aqqutaasinnaasumik, ataavartumik aaqqissuussinissaq nassaarineqartariaqartoq naalakkersuisut isumaqarput.

Tamassuma isummerfigineqarnissaa ukiumi nutaami piniarneq pillugu isumasioqatigiinnermi anguniarneqassaaq.

Naalakkersuisut ukiuni 2001-imi 2002-mi aamma 2004-mi kommunenit, KNAPP-niit, KNAPK-miillu saaffiginnissutit aallaavigalugit piniartut aningaasatigut ajornartorsiortut juulleriartornerani tapiissuteqarfigisarnikuuaat.

Silap pissusaata allanngoriartornera, taassumalu kinguneranik piniagassaaleqineq, piniartut ajornartorsiornerannut peqqutaasut Naalakkersuisunit nalunaarutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq