Ikiorneqarnissamik suli pisariaqartitsipput
Kinguaassiutitigut atornerluisoqarnerata kingunerisaanik Atammimmi innuttaasut ikiorneqarnissamik suli pisariaqartitsipput, Maniitsulli kommuneata ikiuussinnaanissaa suli nalunarallarpoq.
Atammimmi nukappiararpassuarnik kinguaassiutitigut ukiut sisamat matuma siornagut atornerluisoqarsimanera pillugu tusagassiuutitigut tusarliussineq Atammimmiunut misigissutsikkut qamuuna aalassatsitsiinnarani kamannermik kanngusunnermillu misigisaqarfiuvoq. Nukappiaqqanut marlunnut atornerlunneqarsimasunut anaanaasoq kinaassutsiminik isertuusserusuttoq tamatumunga ima oqarpoq:
- Qamuuna assut aalaterneqarpunga, kamaammernarlunilu kanngutsiallannarpoq, anaanaasoq oqarpoq.
Aamma oqarpoq, ikiorneqarnissamik pisariaqartitsineq nunaqarfimmiuni malunnaqisoq, pingaartumik inersimasut angajoqqaanngorsimasut minnerunngutsumillu meeqqat ikiorneqarnissaminnik pisariaqartitsisut malunnarnerarpai.
Maniitsulli Kommunea iliuuseqaqqinnianngikkallarpoq. Kommunalbestyrelsemi inunnik isumaginninnermut ataatsimiititaliami siulittaasoq Bitten Heilmann Atassummeersoq isumaqarpoq, Atammimmi pisimasunut tunngatillugu iliuuserisimasat Maniitsup Kommuneanit maannamut naammagisimaarneqarluartut.
Atornerluisoqarsimanerup paasineqarnerata kingorna kommunep iliuuuserisimasaa anaanaasup naammaginarsorinngilaa. Taanna isumaqarpoq sapaatip akunneranut marloriarluni nalunaaquttap akunnerata affakkaartumik oqaloqatigineqartarsimaneq naammanngitsoq. Aamma oqarpoq, taamatut ikiuineq ukiup ataatsip ingerlanerani akuttusiartorsimasoq, ukiorlu qaangiutinngitsoq qaammatit marlukkaarlugit oqaloqatiginnittarnerit ingerlanneqartalersimasut, uffalu pisariaqartitsineq suli annertungaluaqisoq, anaanaasoq Radioaviisimut nassuiaavoq.
Inunnik isumaginninnermut ataatsimiititaliap siulittaasuata Bitten Heilmannip oqaatigaa, Maniitsup Kommuneata piffissami aggersumi nalilersussagaa, Atammimmi inissisimasussamik pitsaaliuinermik suliaqartussamik atorfinitsitsisoqassanersoq.
Maniitsup Kommuneani borgmesteri Sivert K. Heilmann oqaaseqarnissaminut mianersorneruvoq, oqarporlu, pinaveersaartitsinissamik siunnersortimik atorfinitsitsisinnaaneq kommunalbestyrelsip novembarimi ataatsimiilerunik oqaluusereqqaassagaa.
