Ikinnerpaamik inuit 16-it toqupput
Nunatta nalunaaqutaa malillugu ulloqeqqanut tanneq sisamanngortorlu, Norgemi Naalakkeruisut qitiusoqarfianni, Oslop qiterpasissuaniittumi qaartartoq qaartinneqarpoq. Illorsuit arlallit aseruatiterneqarput, taakkununnga ilaavoq Norgep ministeriunerata, Jens Stoltenbergip allaffeqarfissua.
Maannamut paasisat malillugit inuit arfineq-marluk toqutaasimapput arlalissuillu ikiligaasimallutik.
Oslomi qaartartup qaartinneqarnerata kinguninngua, qeqertami Utøya-mi, Oslop avatinnguaniittumi, Sulisartut Partiiata inuusuttaasa tammaarsimaffianni, angut politiitut atukkersorsimasoq taakkununnga aallaammik eqqaassisimavoq. Eqqaassinermi inuit qulingiluat toqutaasimapput. Eqqaassisoq angutaavoq Norgemiusut isikkulik, politiitut atukkersorsimasoq. Eqqaassilinnginnermini taanna suaartarsimavoq Oslomi qaartartummerineq pillugu misissuilluni. Taama suaartareernermi kinguninngua angut eqqaassigami inuit qulingiluat toquppai.
Socialdemokratiit Inuusuttaasa Kattuffiata qeqertami tammaarsimaarfik ingerlataraat, eqqaassinermilu inuusuttut 560-it missaanniittutpeqataasimapput.
Norgemi politiit nalunaarutigaat angut eqqaassisoq maanna tigusarineqareersimalersoq.
Oslop qiterpasissuani pisoq qeqertamilu, Utøya-mi pisoq imminnut attuumassuteqartut politiinit ilimagineqarpoq.
- Inuk ataaseq tigusaraarput, isumaqarpugullu taanna Oslomi pisunut aamma attuumassuteqartoq, Norgemi rigspolitimesteri, Sveinung Sponheim nutaarsiassaqartitsivimmut NTB-mut oqarpoq.
Oslomi qaartartup qaanngitsiarnerani takuneqarsimavoq angut politiitut atukkersorsimasoq. Taanna aamma politiinit kinaassusersineqarsimalereersoq oqaatigineqarpoq. Taamaattoq politiit oqaatigerusunngilaat angut taanna kisimiilluni qaartartumeerisimanersoq.
