Ilimmarfiup suliariumannittussarsiuunneqarnerani suliffeqarfiit tallimat ajugaapput. Radioaviisip paasisai naapertorlugit sulisut ikinnerpaamik 35-t 40-llu akornanniittut sanaartornermi sulisorineqassapput.
Suliffeqarfik Larsen & Company sanaartorfigiuminarsaasussaavoq, poorskeriitsiarpallu sulinertik aallartissavaat. Sulisut nunatsinneersuussasut, Larsen & Comapany-mi pisortaq Mogens Larsen unnersiorpoq.
-Sulisutsinnut pingaaruteqartorujussuuvoq, naatsorsuutigaarpullu Nuumminngaanneersut arfineq-pingasut qulillu akornanniittut sulissasut, Mogens Larsen oqarpoq.
Suliffeqarfik Permagreen Grønland toqqavilersuissaaq, sulisussallu maajip naajartulernerani suliartik aallartissavaat:- Sulisut 18-t 20-llu akornanniittut sulisinnaassapput, taakkulu aappagu aggustip tungaanut sulissapput, Permagreenimeersoq Henning Kristensen oqarpoq.
Brøndum Grønland atortussanik ikkussuissapput, pisortaallu Vagn Frederiksen oqarpoq sulisut pingasut sisamalluunniit atortussanik ikkussuisuussasut, ataatsimillu ilinniartoqarnissartik naatsorsuutigaat. Eqqakkanik aqqusiorneq ukioq manna aallarnerneqassaaq, aappaagulu illup iluani atortussiat, soorlu silaannarissarfiit allallu ikkussorneqalissallutik.
Innaallagisserisussapput Nuumminngaanneersut Arsarnerit, pisortaallu Torben Nielsen oqarpoq sulisut sisamat tallimalluunniit suliorineqassasut.
Taakku aappaagu aggustimi illu napparneqareerpat kallerup inneranik tunngasunik suliaqalissapput.
Ilimmarfiup sananeqarnera 191 million koruuneqassangatinneqarpoq, sanaartornerlu ukiut pingajuata qeqqa ingerlanneqassangatinneqarluni.
Illutavianik suliarinnittussanit Pihl & Sønimit sulisussat qassiisussaanerinik paasiniaagaluaratta iluatsissimanngilarput.
