Ikiliartorunnaarnissaasa tungaanut eqqusseqqusiunnaartoqassaaq

Qilalukkap tuugaavinik, tuugaanit pinnersaasianik qernertallu mattaanik neqaanilluunniit Danmarkimut EU-llu sinneranut eqquteqqusiunnaarneq ataannartussanngorpoq. EU-kommissionip ilisimatuussitsikkut ataatsimiititaliaa isumaqarpoq qernertat nunatsinni illersorneqarnerat suli amigartoq, taamaattoqartillugulu qernertat pisataannik EU-mut eqqussineq inerteqqutaagallassasoq.

Qilalukkat qernertat pisataannik EU-mut eqqusseqqusiunnaarnissamik Hollandip piumasaa taamaalilluni EU-mi nunat sinnerinit ilalerneqarpoq.

Danmarkimi avatangiisinut ministereqarfik nunarput sinnerlugu suliamik malinnaavoq, tassanilu atorfilik Niels Nielsen oqarpoq eqqusseqqusiunnaarneq sumorsuaq atuunnavianngitsoq.

- Qilalukkat qernertat amerlassusiat ernumanmarunnaarpat imaluunniit piujuaannartitsiniarluni iliuutsit allanngorpata, soorlu pisassiissutit ikilineqarpata eqqusseqqusiunnaarneq allanngortinneqassasoq qularnanngilaq, Niels Nielsen oqarpoq.

Qilalukkat qernertat killilersorneqarnerat aasaq julimi aallartippoq, ukiumullu pisassat 300-nik amerlassusilerneqarput, nunatsinnilu taama killilersuineq EU-mi iluarineqaraluarluni suli naammagineqanngilaq.

Qilalukkat tuugaavinik piniartut aningaasarsiuteqarnerat annertugisassanngikkaluarluni piniartunut ataasiakkaanut isertitsissutaalluartarpoq.

Tuugaanik nunatsinni piseriarlutik avammut nioqquteqartartut akornanni Radioaviisip paasisai naapertorlugit tuugaat ukiumut 20-it missaat piniartunit pisiareriarlugit Danmarkimut tunineqartarput, katillugit 200.000 kr.-it miss.isertitsissutaasarlutik. Aammali piniartut tuugaanik inuinnarnut tuniniaasarput, tamakkulu pisisumit akitsorserussisarfinni tuniniarneqaraangamik 20.000 kr.-it angullugit pisarsissutigineqarsinnaasarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat