Ikiaroortartut akiliinerusalissapput

februaarip 08-at 2007 10:32

Danmarkimi inatsisinik atortitsinermut ministerip Lene Espersenip ikiaroornartumik hashimik tigumialinnut pillaatitut akiliutigitinneqartartoq qaffakkusuppaa, allaat sisamariaammik angissuseqalersillugu. Siunissami Danmarkimi hashiminermik tigumiaqarluni tigusaagaanni 2.000 koruuninik akiliisitaanermik kinguneqassaaq. Aappassaanik aamma pingajussaanik tigusaaguit annerusumik akiliisitaassaatit. Tamanna pillugu atornerlueriaatsinik ilisimatusarsimasut ileqimisaartuinnarput iluaqutaanavianngitsorlu oqaatigalugu.

Inuusuttut hashimik atuinerat akiliisitsisarnerup qaffanneratigut minnerulernavianngilaq. Danmarkimi naalakkersuisut hashimik tigumialinnut pillaatitut akiliutigitinneqartartumut sisamariaammik qaffaaniarnerat pillugu atornerlueriaatsinik ilisimatusarsimasut ileqimisaartuinnarput.

Danmarkimi naalakkersuisut inuiaqatigiinnut oqariartuutigerusuppaat inuit hashimik ikiaroorniutinilluunniit allanik tigumiaqartarnerat akuersaanngikkitsik.

- Taamaattumik pillaatitut akiliutigitinneqartartut qaffarujussuarniarpavut, inatsisinik atortitsinermut ministeri Lene Espersen oqarpoq.

Manna tikillugu hashiminermik tigumiaqarluni tigusaagaanni 500 koruuninik akiliisitaanermik kinguneqartarpoq. Siunissami taanna 2.000 koruuninut qaffanniarneqarpoq. Aappassaanik pingajussaanillu tigusaagaanni akiliutissaq 50 procentimik 100 procentimillu qaffanneqassaaq.

- Kisianni isumaqarpunga tamanna atornerluinermik ajornartorsiuteqarnerpaanut sunniuteqarnavianngitsoq, atornerlueriaatsinik ilisimatusarsimasoq Steen Bak Esbjergimeersoq oqarpoq.

Aamma tamanna inuusuttunut festernerminni imusamik pujortaammilluunniit ataasiartartunut anusinngorsaataanavianngitsoq atornerlueriaatsinik ilisimatusarfimmi ilinniartitsisup Vibeke Asmussenip oqaatigaa.

- Taamaaliornikkut pinaveersaartitsineq anguneqarnavianngilaq, Vibeke Asmussen oqarpoq.

Vibeke Asmussenip aamma oqaatigaa Europami nunani allani misilittakkat ersersikkaat, pillaatitut akiliutip qaffanneratigut hashimik atornerluineq minnerulerneq ajortoq.

- Europami naasumik ikiaroorniummik cannabis-imik atuineq inerteqquteqarnikkut akuersaarnerunikkulluunniit sunnerneqarneq ajorpoq, Vibeke Asmussen oqarpoq.

Atornerlueriaatsimik ilisimatusarsimasup oqaatigaa naalakkersuisut akuerisariaqaraat hash tassaalersimammat inuusuttut kulturiata ilaa. Taamaattumik inerteqquteqarneq pinnagu naalakkersuisut qanoq ajoqutaannginnerusumik hashimik atuisoqarsinnaanersoq paasisitsiniutigisariaqaraat atornerlueriaatsimik ilisimatusarsimasup oqaatigaa.

- Tamanna inerteqquteqarnermit sunniuteqarnerussaaq, Vibeke Asmussen oqarpoq.